بالی ووڈ میں کچھ اداکار اور گلوکار(Singer) ایسی جوڑیاں بناتے ہیں جنہیں فینز ہمیشہ یاد رکھتے ہیں۔ انہی میں سے ایک کامیاب جوڑی اداکار رنویر سنگھ اور گلوکار ارجیت سنگھ کی ہے۔ ارجیت سنگھ کی آواز رنویر سنگھ کی مختلف فلمی کرداروں پر ہمیشہ خوب جچی ہے، چاہے وہ محبت کرنے والے نوجوان کا کردار ہو، بہادر جنگجو، شرارتی لڑکا یا اپنے خواب پورے کرنے والا ایک عام انسان۔ دونوں نے ایک ساتھ کئی ایسے گانے دیے ہیں جو نہ صرف ریلیز کے وقت مقبول ہوئے بلکہ آج بھی لوگوں کی پسندیدہ پلے لسٹ کا حصہ ہیں۔
حال ہی میں فلم "دھورندھر" کا گانا "گہرا ہوا" ریلیز ہوا، اس گانے کو کافی پسند کیا جا رہا ہے۔ اسی موقع پر ان دونوں کی کامیاب جوڑی کے 10 بہترین گانوں پر ایک نظر ڈالی گئی ہے۔
فہرست میں پہلے نمبر پر "سجدے" (فلم: قتل دل، 2014) ہے۔ اس گانے کی موسیقی شنکر، احسان اور لوئے نے ترتیب دی، بول گلزار نے لکھے جبکہ ارجیت سنگھ کے ساتھ نیہیرا جوشی (Nihira Joshi) نے بھی اپنی آواز دی۔ لیکن یہ گانا ریلیز کے وقت بہت زیادہ مشہور نہیں ہوا، لیکن بعد میں اسے خوب پسند کیا گیا۔ اس گانے میں رنویر سنگھ اور پرینیتی چوپڑا کے درمیان محبت کی خوبصورت کہانی دکھائی گئی۔
دوسرے نمبر پر "بنتے دل" (فلم: پدماوت، 2018) شامل ہے۔ اس گانے کی موسیقی سنجے لیلا بھنسالی نے ترتیب دی جبکہ بول اے ایم توراز نے لکھے۔ اس گانے میں عربی اور ہندوستانی کلاسیکی موسیقی کا خوبصورت امتزاج دیکھنے کو ملتا ہے۔ یہ گانا رنویر سنگھ کے مشہور کردار علاؤالدین خلجی پر فلمایا گیا تھا۔ اسی گانے پر ارجیت سنگھ کو بہترین پلے بیک سنگر کا پہلا نیشنل فلم ایوارڈ بھی ملا۔
تیسرے نمبر پر "لال عشق" (فلم: گولیوں کی راس لیلا رام لیلا، 2013) ہے۔ اس گانے کی موسیقی بھی سنجے لیلا بھنسالی نے ترتیب دی جبکہ بول سدھارتھ گریما نے لکھے۔ اس گانے میں ارجیت سنگھ کی آواز نے رنویر سنگھ اور دیپیکا پڈوکون کے درمیان محبت کو خوبصورتی سے پیش کیا، یہی وجہ ہے کہ سالوں بعد بھی یہ گانا لوگوں میں مقبول ہے۔
چوتھے نمبر پر فلم "دھورندھر" (2025) کا نیا گانا "گہرا ہوا" شامل ہے۔ اس گانے کی موسیقی شاشوت سچدیو (Shashwat Sachdev)نے ترتیب دی اور بول کمار نے لکھے۔ ارجیت سنگھ کی دلکش آواز اور خوبصورت دھن نے اس گانے کو فلم کے نمایاں گانوں میں شامل کر دیا ہے اور اسے فینز کی جانب سے اچھی پذیرائی مل رہی ہے۔
پانچویں نمبر پر "آیات" (فلم: باجی راؤ مستانی، 2015) ہے۔ اس گانے کی موسیقی سنجے لیلا بھنسالی نے ترتیب دی جبکہ بول اے ایم توراز نے لکھے۔ یہ گانا باجی راؤ اور مستانی کے درمیان محبت اور جذبات کو خوبصورت انداز میں پیش کرتا ہے، جبکہ ارجیت سنگھ کی آواز نے اسے مزید دلچسپ بنا دیا۔
چھٹے نمبر پر "جیا" (فلم: غنڈے، 2014) شامل ہے۔ اس گانے کی موسیقی سہیل سین نے ترتیب دی اور بول ارشاد کامل نے لکھے۔ فلم ایکشن سے بھرپور تھی، لیکن یہ رومانوی گانا رنویر سنگھ اور پرینکا چوپڑا کی خوبصورت کیمسٹری کی وجہ سے خاص پسند کیا گیا اور آج بھی فلم کے بہترین گانوں میں شمار ہوتا ہے۔
ساتویں نمبر پر "لہرا دو" (فلم: 83، 2021) ہے۔ اس گانے کی موسیقی پریتم نے ترتیب دی جبکہ بول کوثر منیر نے لکھے۔ یہ گانا 1983 کے کرکٹ ورلڈ کپ میں بھارت کی تاریخی فتح پر مبنی ہے۔ ارجیت سنگھ کی آواز نے رنویر سنگھ کے کپل دیو کے کردار کو مزید مؤثر بنا دیا اور یہ فلم کا سب سے جذباتی گانا بن گیا۔
آٹھویں نمبر پر "وے کملیا" (فلم: راکی اور رانی کی پریم کہانی، 2023) شامل ہے۔ اس گانے میں ارجیت سنگھ، شریا گھوشال، شاداب فریدی اور التمش فریدی نے آواز دی۔ موسیقی پریتم نے ترتیب دی جبکہ بول امیتابھ بھٹاچاریہ نے لکھے۔ یہ گانا سال کے سب سے زیادہ پسند کیے جانے والے رومانوی گانوں میں شامل رہا۔
نویں نمبر پر "تم کیا ملے" (فلم: راکی اور رانی کی پریم کہانی، 2023) ہے ۔ اس گانے کی موسیقی بھی پریتم نے ترتیب دی جبکہ بول امیتابھ بھٹاچاریہ نے لکھے۔ ارجیت سنگھ نے شریا گھوشال کے ساتھ مل کر یہ گانا گایا۔ اس گانے نے ارجیت سنگھ کو فلم فیئر کی فہرست میں شامل کیا اور آئیفا ایوارڈ بھی دلوایا، جبکہ یہ 2023 کے سب سے زیادہ سنے جانے والے گانوں میں شامل رہا۔
دسویں نمبر پر "نشے سی چڑھ گئی" (فلم: بے فکرے، 2016) ہے۔ اس گانے کی موسیقی وشال شیکھر نے ترتیب دی جبکہ بول جے دیپ ساہنی نے لکھے۔ یہ گانا فلم کے ریلیز کے بعد زبردست ہٹ ثابت ہوا اور موسیقی کی فہرستوں، پارٹیوں اور شادیوں میں مسلسل بجایا جاتا رہا۔ تقریباً کافی عرصے بعد بھی یہ گانا رنویر سنگھ کی فلمی زندگی اور ارجیت سنگھ کے کیریئر کے کامیاب ترین گانوں میں شمار ہوتا ہے۔
ارجیت سنگھ اور رنویر سنگھ کی یہ جوڑی آج بھی بالی ووڈ کی کامیاب ترین اداکار اور گلوکار کی شراکت داری (Partnership)میں شمار ہوتی ہے۔ ان کے یہ گانے ثابت کرتے ہیں کہ جب اچھی موسیقی، مضبوط بول اور بہترین اداکاری ایک ساتھ ہو تو وہ سالوں تک لوگوں کے دلوں میں زندہ رہتے ہیں۔
