تمل ناڈو کے اسمبلی انتخابات میں تاریخی کامیابی حاصل کرنے والےتھلاپتی وجے سے بدھ کے روز ریاست کے کانگریس رہنماؤں نے ملاقات کی اور حکومت سازی کے لیے حمایت کا خط سونپا۔ ریاست میں کانگریس کے انچارج گریش چوڈنکر نے اس کی اطلاع دی۔ انہوں نے ایک بیان میں کہا کہ تمل ناڈو کانگریس کمیٹی اور کانگریس لیجسلیچر پارٹی نے حکومت سازی کے لیے تملگا ویٹری کڑگم (TVK) کو اپنی مکمل حمایت دینے کا فیصلہ کیا ہے۔
لوک سبھا اور بلدیاتی انتخابات میں بھی برقرار رہے گا اتحاد
چوڈنکر نے کہا کہ یہ اتحاد اس شرط پر ہے کہ TVK اتحاد سے ان تمام فرقہ پرست طاقتوں کو باہر رکھے گا جو آئین پر یقین نہیں رکھتیں۔ انہوں نے مزید کہا کہ TVK اور کانگریس کے درمیان یہ اتحاد تھنتھائی پیریار، بی آر امبیڈکر اور پرونتھلائیور کامراج کے شاندار ایام کو واپس لانے کی کوشش کرے گا۔
چوڈنکر کے مطابق، یہ اتحاد باہمی احترام، مناسب حصے داری اور مشترکہ ذمہ داری پر مبنی ہے، جو موجودہ حکومت کے ساتھ ساتھ بلدیاتی، لوک سبھا اور راجیہ سبھا انتخابات کے لیے بھی نافذ العمل رہے گا۔
حلف برداری کی تقریب میں راہل گاندھی کی شرکت متوقع:
TVK کے ساتھ اتحاد کے بعد، کانگریس کے رکن پارلیمنٹ اور لوک سبھا میں اپوزیشن لیڈر راہل گاندھی 7 مئی کو ہونے والی تھلاپتی وجے کی حلف برداری کی تقریب میں شرکت کر سکتے ہیں۔ اس سے قبل، کانگریس صدر ملکارجن کھڑگے کی ہدایت پر تمل ناڈو کانگریس کمیٹی نے راجیش کمار کو کانگریس لیجسلیچر پارٹی کا لیڈر منتخب کیا ہے۔
واضح رہے کہ TVK نے 234 میں سے 108 نشستیں جیتی ہیں، جبکہ کانگریس کو 5 نشستیں حاصل ہوئی ہیں۔ حکومت سازی کے لیے درکار اکثریت کا ہندسہ 118 ہے۔
