دہلی کیپٹلز کے کرکٹر ابھیشیک پوریل کو ایک میڈیکل طالبہ کی شکایت پر درج مقدمے کے سلسلے میں گرفتار کیا گیا ہے۔ پولیس کے مطابق، کرکٹر کے خلاف عصمت دری، مجرمانہ دھمکی اور دیگرسنگین دفعات کے تحت کیس درج کیا گیا ہے۔ معاملے کی تفتیش جاری ہے اور پولیس شکایت میں لگائے گئے الزامات کی مختلف پہلوؤں سے جانچ کر رہی ہے۔ پولیس کے مطابق ابھیشیک پوریل کو دم دم پولیس اسٹیشن کی حدود میں واقع امامی سٹی (Emami City) سے حراست میں لیا گیا۔ یہ کارروائی جون کے اوائل میں ایک میڈیکل طالبہ کی جانب سے درج کرائی گئی شکایت کے بعد کی گئی۔ شکایت میں خاتون نے کرکٹر پر سنگین الزامات عائد کیے ہیں۔
شادی کا وعدہ کرکے تعلق قائم کرنے کا الزام
پولیس کو دی گئی شکایت کے مطابق، خاتون نے الزام لگایا کہ ابھیشیک پوریل نے شادی کا وعدہ کرکے اس کے ساتھ جنسی تعلق قائم کیا۔ شکایت کنندہ کا مزید دعویٰ ہے کہ بعد میں حالات خراب ہونے پر اسے مبینہ طور پر حملے اور دھمکیوں کا سامنا کرنا پڑا۔ پولیس نے شکایت کی بنیاد پر مقدمہ درج کیا اور تحقیقات شروع کیں۔ اب کرکٹر کی گرفتاری کے بعد پولیس اس معاملے میں دستیاب شواہد، بیانات اور دیگر متعلقہ پہلوؤں کی جانچ کر رہی ہے۔
کرکٹ حلقوں میں بھی تشویش
ابھیشیک پوریل کی گرفتاری کی خبر سامنے آنے کے بعد کرکٹ سے وابستہ حلقوں میں بھی تشویش پیدا ہوگئی ہے۔ ابھیشیک پوریل ڈومیسٹک کرکٹ میں اپنی کارکردگی کے باعث پہچان بنا چکے ہیں اور دہلی کیپٹلز کے اسکواڈ کا حصہ رہے ہیں۔ ایک ابھرتے ہوئے کرکٹر کے خلاف اسطرح کے الزامات سامنے آنے سے شائقین کے درمیان بھی بحث شروع ہوگئی ہے۔
تحقیقات کے بعد حقیقت سامنے آئے گی
پولیس اب اس بات کا تعین کرنے کی کوشش کر رہی ہے کہ شکایت میں لگائے گئے الزامات سے متعلق کیا شواہد موجود ہیں۔ تفتیش کے دوران دونوں فریقوں کے بیانات، دستیاب ڈیجیٹل شواہد اور دیگر متعلقہ معلومات کی جانچ کی جا سکتی ہے۔ اس معاملے میں اب قانونی کارروائی آگے بڑھے گی اور عدالت شواہد کی بنیاد پر فیصلہ کرے گی۔ ابھیشیک پوریل کے خلاف لگائے گئے الزامات فی الحال زیرِ تفتیش ہیں، اور عدالت کی جانب سے جرم ثابت ہونے تک انہیں قانونی طور پر قصوروار قرار نہیں دیا جا سکتا۔پولیس نے تصدیق کی ہے کہ معاملے کی تفتیش جاری ہے۔ آنے والے دنوں میں تحقیقات سے مزید معلومات سامنے آنے کی توقع ہے، جس کے بعد اس کیس کی مکمل تصویر واضح ہوسکے گی۔
