مانسون کے کمزور پڑنے سے کئی ریاستوں میں گرمی کا سلسلہ شروع ہو گیا ہے، لیکن ہفتے سے موسم کے پلٹنے کے امکانات ہیں۔ہندوستانی محکمہ موسمیات (IMD) نے 13 ستمبر کو 12 ریاستوں میں بارش کا اورنج الرٹ اور 15 میں یلو الرٹ جاری کیا ہے۔مغربی بنگال، سکم، اوڈیشہ، اروناچل پردیش، ناگالینڈ، منی پور، آسام اور میگھالیہ میں 16 ستمبر تک شدید بارش ہو سکتی ہے، جبکہ اتر پردیش، جموں و کشمیر، ہماچل پردیش اور اتراکھنڈ میں 14 ستمبر تک طوفانی بارش کی وارننگ ہے۔
ان ریاستوں میں شدید بارش کا الرٹ:
اتر پردیش کے 11 اضلاع میں ہفتے کو تیز بارش کا الرٹ جاری کیا گیا ہے، جس سے لوگوں کو گرمی سے راحت مل سکتی ہے، وہیں اناؤ میں گنگا کا پانی خطرے کے نشان سے اوپر ہونے کی وجہ سے 80 دیہات سیلاب کی زد میں ہیں۔ بہار اور اس کے آس پاس کے علاقوں میں کم دباؤ کا علاقہ بننے سے اگلے چند دنوں تک کئی حصوں میں تیز بارش ہو سکتی ہے۔ یہاں 13 ستمبر کو 27 اضلاع میں یلو الرٹ جاری کیا گیا ہے۔
پنجاب میں راحت:
پنجاب میں ندیوں کا پانی کم ہونے سے سیلاب زدہ علاقوں میں پانی گھٹنے سے لوگوں کو راحت ملی ہے۔ یہاں ہفتے کو ہلکی پھوار پڑنے کا امکان ہے۔محکمہ موسمیات نے ہریانہ کے 4 اضلاع میں تیز بارش کا یلو الرٹ جاری کیا ہے۔16ستمبر کے بعد ریاست میں مانسون کی سرگرمی بڑھنے کا امکان ہے۔ٹرف اور سائیکلونک سرکولیشن سسٹم کی وجہ سے 14-15 ستمبر سے مدھیہ پردیش میں تیز بارش کا سلسلہ دوبارہ شروع ہو سکتا ہے۔
پہاڑوں پر مصیبت کی بارش جاری:
پہاڑی ریاستوں کی بات کریں تو ہماچل پردیش کے کئی اضلاع میں جمعہ کی رات تیز بارش ہوئی۔ 13 اور 14 ستمبر کو بھی کنور-لاہول اسپتی کو چھوڑ کر تمام اضلاع میں زور دار بارش کا امکان ہے۔اتراکھنڈ کے کئی اضلاع میں شدید بارش کا امکان بنا ہوا ہے۔جموں و کشمیر کے بیشتر علاقوں میں بادل چھائے رہ سکتے ہیں اور کچھ جگہوں پر گرج کے ساتھ پھوار پڑنے کا امکان ہے۔ اس کے ساتھ ہی کچھ مقامات پر تیز بارش ہو سکتی ہے۔
یہاں گرمی پریشان کن:
دہلی میں مانسون کی سرگرمی کمزور پڑ گئی ہے، جس سے گرمی لوگوں کو پریشان کر رہا ہے۔ بارش نہ ہونے سے فی الحال اس سے راحت ملنے کی امید نہیں ہے۔دوسری طرف یمونا کا پانی کم ہونے سے کیمپوں میں رہ رہے سیلاب متاثرین کے گھر واپس لوٹنے کی امید بڑھ رہی ہے۔راجستھان میں بھی ان دنوں موسم صاف ہے اور 17 ستمبر کو یہاں مانسون کے دوبارہ فعال ہونے کا امکان ظاہر کیا گیا ہے۔
