ملک کے بیشتر علاقوں میں مانسون کی بارشوں نے تباہی مچا دی ہے۔ خاص طور پر ہمالیائی ریاستوں میں بھاری تباہی دیکھی جا رہی ہے۔ گزشتہ چند دنوں میں شدید بارش اور لینڈ سلائیڈنگ کی وجہ سے کئی مقامات پر سڑکیں ٹوٹ جانے کی وجہ سے امرناتھ یاترا کو 3 ستمبر تک روک دیا گیا ہے۔ جموں و کشمیر کے ساتھ ساتھ ہماچل پردیش میں بارش، سیلاب اور لینڈ سلائیڈنگ کی وجہ سے قومی شاہراہوں سمیت کئی سڑکیں بند ہو گئی ہیں۔ بارش کی وجہ سے کئی میدانی ریاستوں میں سیلاب جیسی صورتحال پیدا ہوگئی ہے۔ فی الحال کوئی راحت نظر نہیں آ رہی ہے کیونکہ محکمہ موسمیات نے مغربی ہمالیائی علاقے سے لے کر شمال مشرق اور مشرقی ہندوستان تک کے مختلف علاقوں میں آئندہ سات دنوں تک موسلا دھار بارش جاری رہنے کی پیش قیاسی کی ہے۔
اس کے علاوہ مرکز کے زیر انتظام علاقوں میں آج بھی بارش کا امکان ہے۔محکمہ موسمیات نے آئندہ 7 دنوں کے دوران شمال مشرقی اور اس سے ملحقہ مشرقی ہندوستان میں موسلادھار بارش جاری رہنے کی پیش گوئی کی ہے۔ اس دوران مغربی بنگال اور سکم، میگھالیہ میں 2 اور 3 اگست اور اروناچل پردیش اور بہار میں 3 اگست کو انتہائی شدید بارش ہو سکتی ہے۔ ہماچل پردیش میں 6 اگست تک جاری رہنے والی شدید بارش کیلئے اورنج الرٹ جاری کیا گیا ہے۔ بارش کی وجہ سے ریاست میں 283 راستے اب بھی بند ہیں۔
شمالی ہندوستان میں مسلسل بارش کی وجہ سے دریاؤں کی سطح آب بڑھ رہی ہے۔ جمنا ندی میں پانی کی سطح بڑھنے سے پانی گائوں میں داخل ہونے لگا ہے جس سے سیلاب جیسی صورتحال پیدا ہوگئی ہے۔ اس صورتحال کا جائزہ لینے کے لیے کانپور کے ضلع مجسٹریٹ کپل سنگھ نے سیلاب سے متاثرہ علاقوں کا دورہ کیا اور حکام کے ساتھ صورتحال کا جائزہ لیا۔ گاؤں کے لوگ اس پانی سے اتنے پریشان ہو گئے ہیں کہ انہوں نے سفر کے لیے کشتیوں کا انتظام کر لیا ہے اور انہیں استعمال کر رہے ہیں۔
