95a7b3ac-0b91-4184-8429-efe85458377a242202515306.jpg)
حیدرآباد میٹرو ریل لمیٹڈ اور حیدرآباد ایرپورٹ میٹرو لمیٹڈ کے منیجنگ ڈائرکٹر این وی ایس ریڈی نے کہا کہ حیدرآباد انٹرنیشنل ایرپورٹ سے فیوچر سٹی تک میٹرو روٹ کو’ ماڈل گرین روٹ‘ کے طور پر تیار کیا جائے گا۔ تقریباً 40 کلومیٹر کے اس روٹ پر میٹرو ریل کے ذریعے سفر 40 منٹ میں مکمل کیا جا سکتا ہے۔
این وی ایس ریڈی نے پہاڑوں اور میدانی علاقوں کا معائنہ کیا
این وی ایس ریڈی نے آج مختلف محکموں کے عہدیداروں کے ساتھ ایئرپورٹ فیوچر سٹی میٹرو کوریڈور کا معائنہ کیا جو شمش آباد ایرپورٹ سے شروع ہوکر رویریالہ سے گزرے گا۔ انہوں نے کہا کہ نئے میٹرو روٹ کی منصوبہ بندی چیف منسٹر ریونت ریڈی کے ویژن کو ذہن میں رکھتے ہوئے کی جارہی ہے تاکہ فیوچر سٹی کو حیدرآباد، سکندرآباد اور سائبرآباد کے خطوط پر چوتھے شہر کے طور پر تیار کیا جاسکے۔
یہاں بنیادی مقصد آلودگی سے پاک گرین سٹی بنانا ہے۔ اس روٹ پر میٹرو ریل کا توسیعی منصوبہ حیدرآباد ایرپورٹ میٹرو ریل لمیٹڈ، HMDA اور TGIIC کے اشتراک سے بنایا جا رہا ہے، این وی ایس ریڈی نے کہا کہ فیوچر سٹی شہر کے لیے ایک مناسب گرین کوریڈور تیار کرنے اورفیوچر سٹی تک بین الاقوامی ہوائی اڈے سے فوری اور آسان رسائی فراہم کرنے کے منصوبے کے تحت میٹرو ریل روٹ کی تعمیر بہت اہم ہے۔
فیوچر سٹی کے لیے گرین میٹرو کوریڈور کا منصوبہ
این وی ایس ریڈی نے کہا کہ ان منصوبوں کو حقیقت میں بدلنے کی کوشش کی جارہی ہے۔ اس کے علاوہ میٹرو ریل کے ساتھ یہ گرین کوریڈورفیوچر سٹی کی تعمیر میں اہم کردار ادا کرے گا، جو تقریباً پندرہ ہزار ایکڑ پر محیط ہوگی، آلودگی سے پاک ہوگی اور اسے عالمی معیار کی سفری سہولیات فراہم کی جائے گی ۔
این وی ایس ریڈی نے میر خان پیٹ میں زیر تعمیرا سکل یونیورسٹی تک میٹرو کاریڈور کے ڈی پی آر کی تیاری کے لئے کئے جارہے سروے کے کام کا معائنہ کیا۔ انہوں نے عہدیداروں کو ضروری تجاویز دیں۔ انہوں نے کہا کہ شمس آباد ہوائی اڈے سے فیوچر سٹی تک میٹرو روٹ تقریباً 40 کلومیٹر لمبا ہو گا، جو ہوائی اڈے کے ٹرمینل سے شروع ہو کر ہوائی اڈے کی باؤنڈری وال کے ساتھ ساتھ نئے قائم ہونے والے میٹرو ریل ڈپو کی طرف سے ایک بلند روٹ کے طور پر پھیلے گا۔
ہوائی اڈے سے فیوچر سٹی تک 40 کلومیٹر میٹرو روٹ
یہ مانسان پلی روڈ سے 5 کلومیٹر تک گزرے گا اور پیدا گولکنڈہ ORR ایگزٹ پہنچے گا۔ بہادر گوڑہ اور پیدا گولکنڈہ میں دو میٹرو اسٹیشنوں کو انتہائی پرکشش انداز میں تیار کیا جائے گا، جس سے بہادر گڑہ میں تقریباً 1000 تا 1500 ایکڑ سرکاری اراضی کو بین الاقوامی معیار کے مرکز کے طور پر تیار کرنے میں مدد ملے گی۔ میٹرو ریل کے لیے مختص او آر آر احاطے کے اندر، پیدا گولکنڈہ او آر آر ایگزٹ سے رویریال ایگزٹ تک ٹوکگوڈا ایگزٹ کے ذریعے تقریباً 14 کلومیٹر کی میٹرو لائن کو ایلیویٹڈ میٹرو لائن کے طور پر کم اونچائی پر تعمیر کیا جائے گا۔
این وی ایس ریڈی نے کہا کہ 100 میٹر (328 فٹ) چوڑی گرین فیلڈ روڈ کے 22 میٹر (72 فٹ) حصے کو رویریالا ایگزٹ سے اسکلز یونیورسٹی تک HMDA کے ذریعے تعمیر کیا جا رہا ہے، اسے سڑک کے بیچ میں ایک ایٹ گریڈ میٹرو ریل کاریڈور کے طور پر تیار کیا جائے گا۔
فیوچر سٹی میٹرو کوریڈور کا ڈی پی آر مارچ تک تیار ہو جائے گا۔سڑک کے بیچ میں اسی سطح پر میٹرو ریل ہوگی اور اس کے دونوں اطراف تین لین والی مین سڑک ہوگی۔ میٹرو اور مین روڈ کو الگ کرنے کے لیے درختوں اور ہریالی کو تیار کیا جائے گا اور مین روڈ کے دونوں اطراف دو مزید سروس روڈز بنائے جائیں گے۔ انہوں نے کہا کہ بصیرت کے طور پر آنجہانی چیف منسٹر وائی ایس راج شیکھرا ریڈی نے مستقبل کی میٹرو ریل کے لئے ORR کے قریب 20 میٹر اراضی کو محفوظ کیا گیا تھا۔اب وہ جگہ کام آ رہی ہے۔ HMDA، TGIIC اور میٹرو ریل ان منصوبوں کو عملی جامہ پہنانے کے لیے مشترکہ طور پر کام کر رہے ہیں۔ فیوچر سٹی میٹرو کوریڈور کے ساتھ میڈچل اور شامیرپیٹ کوریڈور کا ڈی پی آر مارچ کے آخر تک مکمل کر کے ریاستی حکومت کی منظوری سے مرکزی حکومت کو پیش کیا جائے گا۔
