ملک کے سب سے مقبول اور لاکھوں طلباء کے پسندیدہ استاد 'خان سر' کے تعلیمی ادارے پر انتظامیہ نے ایک بڑی اور چونکا دینے والی کارروائی کی ہے۔ اتر پردیش کے شہر پریاگ راج میں واقع خان سر کے مشہور کوچنگ انسٹی ٹیوٹ "خان گلوبل کلاسز" کو سیشن کے دوران ہی سیل کر دیا گیا ہے۔ پریاگ راج ڈیولپمنٹ اتھارٹی (PDA) کی ٹیم نے اچانک موقع پر پہنچ کر کلاس رومز کو خالی کروایا اور ادارے پر تالا لگا دیا۔
یہ کارروائی لکھنؤ کے علی گنج علاقے میں پیش آنے والے ایک خوفناک آتشزدگی کے واقعے کے بعد عمل میں آئی ہے، جہاں ایک عمارت میں آگ لگنے سے 15 افراد کی موت ہو گئی تھی۔ اس دردناک حادثے کے بعد یوپی حکومت اور ضلعی انتظامیہ ہائی الرٹ پر ہیں اور حفاظتی قوانین کی خلاف ورزی کرنے والے اداروں کے خلاف مہم شروع کر دی گئی ہے۔
کارروائی کی وجہ،'کمیونٹی فیسلیٹی' کی منظوری کا نہ ہونا بتایا گیا، 23 جون کو پی ڈی اے کے زونل آفیسر گنگیش کمار سنگھ کی قیادت میں جب ٹیم نے خان سر کے سینٹر کا معائنہ کیا تو وہاں ایک بڑا قانونی نقص پایا گیا۔
قانونی پہلو
حکام کے مطابق، جس عمارت میں یہ کوچنگ سینٹر چل رہا تھا، وہ تجارتی (Commercial) استعمال کے لیے تو منظور شدہ تھی، لیکن قانون کے مطابق کوئی بھی کوچنگ انسٹی ٹیوٹ 'کمیونٹی سہولت' (Community Facility) کے زمرے میں آتا ہے۔ اس مخصوص زمرے کے لیے زمین کے استعمال کی الگ اور خصوصی منظوری لینا لازمی ہوتا ہے، جو خان سر کے اس سینٹر کے پاس موجود نہیں تھی۔ قوانین پر عمل نہ کرنے کی وجہ سے انتظامیہ نے دفتر بند کر کے پورے سینٹر کو سیل کر دیا اور باہر نوٹس چسپاں کر دیا ہے کہ بغیر اجازت سیل توڑنے پر سیدھی ایف آئی آر (FIR) درج کی جائے گی۔
صرف خان سر نہیں، 50 مزید کوچنگ سینٹرز نشانے پر
پی ڈی اے کے وائس چیئرمین رشی راج کے حکم پر چلنے والی اس مہم کے تحت یہ کارروائی صرف خان سر کے خلاف نہیں ہوئی ہے۔ اس سے قبل شہر کے تین اور بڑے کوچنگ انسٹی ٹیوٹس کو بھی سیل کیا جا چکا ہے۔ انتظامیہ نے واضح کیا ہے کہ شہر میں تقریباً 50 ایسے مزید کوچنگ سینٹرز کی نشاندہی کی گئی ہے جو حفاظتی اور قانونی معیارات پر پورا نہیں اترتے اور ان کے خلاف بھی جلد سخت ایکشن لیا جائے گا۔
بہار کے پٹنہ سینٹر کو بھی آخری وارننگ
خان سر کے لیے مشکلات صرف اتر پردیش تک محدود نہیں ہیں۔ اس سے قبل 7 جون کو بہار کے دارالحکومت پٹنہ میں بھی خان سر کے مرکزی کوچنگ سینٹر کا فائر فائٹنگ ٹیم نے معائنہ کیا تھا، جہاں فائر سیفٹی (آتشزدگی سے بچاؤ) کے انتظامات میں شدید خامیاں پائی گئی تھیں۔ انتظامیہ کی طرف سے دی گئی ایک ہفتے کی مہلت کے باوجود جب خامیوں کو دور نہیں کیا گیا، تو اب پٹنہ انتظامیہ نے خان سر کو آخری 10 دن کا الٹی میٹم دیا ہے۔ اگر ان 10 دنوں میں فائر سیفٹی کے قوانین پر عمل نہ ہوا، تو پٹنہ کا سینٹر بھی سیل کر دیا جائے گا۔
fa917a67-bc2e-459b-a95a-3e51740046c7246202615549.jpg)
