گوا کے ارپورہ علاقے میں ہفتہ کی دیر رات ایک نائٹ کلب میں آگ لگنے سے 25 افراد کی موت ہوگئی ہے جبکہ درجنوں زخمی ہو گئےہیں ۔ مرنے والوں میں 4 سیاح اور 14 کلب کے ملازمین شامل ہیں۔ سات افراد کی شناخت ہونا باقی ہے۔بتایا جا رہا ہے کہ آگ سلنڈر پھٹنے سے لگی۔ دھماکا اتنا زوردار تھا کہ آگ منٹوں میں پورے کلب میں پھیل گئی۔
حالات کی جانکاری دیتے ہوئے گوا کے ڈی جی پی آلوک کمار نے کہا، ارپورہ کے ایک ریسٹورنٹ-کم-کلب میں ایک افسوسناک واقعہ پیش آیا۔ پولیس کنٹرول روم کو 12:04 بجے آگ لگنے کی اطلاع ملی۔ پولیس، فائر بریگیڈ اور ایمبولینسیں جائے وقوعہ پر روانہ کی گئیں۔ آگ پر اب قابو پا لیا گیا ہے اور تمام لاشیں برآمد کر لی گئی ہیں۔ کل 23 لوگوں کی موت کی وجہ کا پتہ لگا کر پولیس واقعے کی تحقیقات کرے گی۔
آگ کیسے لگی؟
ابتدائی تحقیقات سے معلوم ہوا ہے کہ آگ سلنڈر پھٹنے سے لگی۔ کچن میں آگ لگ گئی اور تہہ خانے میں دھواں بھر گیا۔ اطلاعات کے مطابق آگ لگنے کے بعد لوگ باہر کی طرف بھاگنے کے بجائے تہہ خانے کی طرف بھاگے جو پہلے ہی دھوئیں سے بھرا ہوا تھا۔ جس کے نتیجے میں دم گھٹنے سے 20 افراد ہلاک ہو گئے۔ پولیس آگ لگنے کی وجہ کے طور پر سلنڈر پھٹنے، آتش بازی یا کیمیکل کے امکان کی بھی تحقیقات کر رہی ہے۔
وزیراعظم کا اظہار تعزیت:
وزیر اعظم نریندر مودی نے اس واقعہ پر افسوس کا اظہار کیا۔ انہوں نے لکھا، ارپورہ، گوا میں آتشزدگی کا واقعہ انتہائی افسوسناک ہے۔ میری تعزیت ان تمام لوگوں کے ساتھ ہے جنہوں نے اپنے پیاروں کو کھو دیا ہے۔زخمیوں کو جلد از جلد صحت یابی ملے۔ میں نے گوا کے وزیر اعلیٰ ڈاکٹر پرمود ساونت سے صورتحال کے بارے میں بات کی ہے۔ ریاستی حکومت متاثرین کو ہر ممکن مدد فراہم کر رہی ہے۔
وزیراعلیٰ نے کہا: قصورواروں کے خلاف سخت کاروائی کی جائے گی:
وزیر اعلیٰ ساونت نے لکھا، آج کا دن ہم سب کے لیے بہت افسوسناک دن ہے۔ ارپورہ میں لگنے والی آگ میں 23 افراد اپنی جانوں سے ہاتھ دھو بیٹھے ہیں۔ میں انتہائی غمزدہ ہوں اور ناقابل تصور نقصان کی اس گھڑی میں تمام غمزدہ خاندانوں کے ساتھ اپنی گہری تعزیت کا اظہار کرتا ہوں۔ میں نے جائے وقوعہ کا دورہ کیا اور واقعے کی تحقیقات کا حکم دے دیا ہے۔ ذمہ داروں کو سخت قانونی کارروائی کا سامنا کرنا پڑے گا۔
تمام کلبوں کا سیفٹی آڈٹ کرایا جائے گا:
واقعے کے بعد تمام کلبوں کا فائر سیفٹی آڈٹ کرایا جائے گا۔ مقامی ایم ایل اے مائیکل لوبو نے کہا کہ ریاست کے تمام کلبوں کا سیفٹی آڈٹ کرانا ضروری ہے۔ انہوں نے کہا، سیاح ہمیشہ گوا کو ایک محفوظ مقام سمجھتے ہیں، لیکن یہ واقعہ بہت تشویشناک ہے۔ ایسے واقعات دوبارہ نہیں ہونے چاہیے ۔ سیاحوں اور ان کلبوں میں کام کرنے والے ملازمین کی حفاظت انتہائی اہمیت کی حامل ہے۔ جو کلب مناسب فائر سیفٹی اجازت نامے فراہم کرنے میں ناکام رہتے ہیں، ان کے لائسنس منسوخ کر دیے جائیں گے۔
