وزیر اعظم نریندر مودی نے نئی دہلی میں اپنی رہائش گاہ پر مرکزی وزیر دفاع راج ناتھ سنگھ، قومی سلامتی کے مشیر (این ایس اے) اجیت ڈوول، چیف آف ڈیفنس اسٹاف (سی ڈی ایس) اور ہندوستانی مسلح افواج کے سربراہوں کے ساتھ میٹنگ کی۔ میڈیا رپورٹ کے مطابق اس میٹنگ میں یہ فیصلہ لیا گیا ہے کہ مستقبل میں دہشت گردی کی کسی بھی کارروائی کو بھارت کے خلاف جنگی کارروائی تصور کیا جائے گا اور اسی کے مطابق جواب دیا جائے گا۔
قبل ازیں خارجہ سکریٹری وکرم مصری، کرنل صوفیہ قریشی اور ونگ کمانڈر ویومیکا سنگھ نے میڈیا کو ہندوستان اور پاکستان کے درمیان بڑھتی ہوئی کشیدگی کے درمیان جاری پیش رفت کے بارے میں آگاہ کیا۔ وکرم مصری نے زور دے کر کہا کہ پاکستان کی طرف سے بھارت کے خلاف کیے جانے والے اقدامات کو اشتعال انگیزی کے طور پر دیکھا جا رہا ہے۔
انہوں نے یہ ریمارکس آج پریس کانفرنس کے دوران کیاجہاں پاکستان کی جانب سے پھیلائے جانے والے جھوٹ کو بے نقاب کیا گیا اور پاکستان کی بڑھتی ہوئی اور اشتعال انگیز کارروائیوں کے ثبوت پیش کیے گئے ۔ میڈیا سے بات کرتے ہوئے سیکرٹری خارجہ نے کہا، پاکستان کے اقدامات اشتعال انگیز تھے اور کشیدگی میں اضافہ ہوا، جواب میں، بھارت نے دفاع کیا اور ذمہ داری اور تحمل سے جواب دیا۔
