 (5)babd1db4-f5f3-40f3-8cc8-c8cc7362f79e732026163124.jpg)
کشمیر وادی میں فروری اور مارچ کے پہلے ہفتے کے دوران غیر معمولی گرمی کے بعد موسم میں تبدیلی کی خوشخبری سامنے آئی ہے۔ محکمہ موسمیات کے مطابق آئندہ چند دنوں میں جموں و کشمیر کے مختلف علاقوں میں ہلکی بارش اور برفباری کا امکان ہے۔
محکمہ موسمیات کے ڈائریکٹر ڈاکٹر مختار احمد کے مطابق 7 سے 9 مارچ کے دوران موسم میں تبدیلی کے باعث بیشتر علاقوں میں بادل چھائے رہیں گے جبکہ اونچائی والے علاقوں میں ہلکی بارش اور برفباری ہو سکتی ہے۔ انہوں نے بتایا کہ 10 سے 12 مارچ تک بھی بادل چھائے رہنے اور کئی مقامات پر ہلکی بارش یا برفباری کی توقع ہے۔
اس دوران کپواڑہ، بانڈی پورہ، گاندربل اور اننت ناگ کے اونچائی والے علاقوں میں ہلکی برفباری ہو سکتی ہے۔ محکمہ موسمیات کے مطابق 13 سے 15 مارچ تک بھی موسم زیادہ تر ابر آلود رہنے اور اونچائی والے علاقوں میں بارش یا برفباری کے امکانات برقرار رہیں گے، جبکہ 16 اور 17 مارچ کو بھی اسی طرح کے حالات متوقع ہیں۔
محکمہ موسمیات نے کسانوں کے لیے ایڈوائزری جاری کرتے ہوئے کہا ہے کہ 10 سے 12 مارچ کے درمیان ممکنہ موسمی سرگرمیوں کے پیش نظر کھیتی باڑی کے کام کو عارضی طور پر روک دیا جائے۔
ادھر ماہرین کے مطابق 9 مارچ کے بعد کئی علاقوں میں دن کے درجہ حرارت میں 4 سے 6 ڈگری سیلسیس تک کمی آسکتی ہے۔ رواں سال فروری میں بارش کی شدید کمی ریکارڈ کی گئی۔ سرینگر میں صرف 5.3 ملی میٹر بارش ہوئی جو 1960 کے بعد فروری میں سب سے کم بارش مانی جا رہی ہے۔
اسی طرح جموں شہر میں فروری کے دوران صفر ملی میٹر بارش ریکارڈ کی گئی، جو گزشتہ ایک صدی میں انتہائی نایاب صورتحال ہے۔ ماہرین کے مطابق کم بارش کے باعث خطے میں خشک سالی جیسے حالات پیدا ہو گئے تھے، تاہم آئندہ دنوں میں متوقع بارش اور برفباری سے موسم میں کچھ بہتری آنے کی امید ہے۔
 (6)5e9b95fb-ab5b-4293-8775-a2e3b8579131732026174951.jpg)
