آندھراپردیش کے ضلع نیلور میں ایک سنگین سڑک حادثہ پیش آیا۔ سنگم منڈل کے پیرامنا میں قومی شاہراہ پر ایک ٹپر نے کار کو ٹکر مار دی۔ حادثے میں ایک بچے سمیت سات افراد ہلاک ہوگئے۔حادثہ اس وقت پیش آیا جب غلط راستے سے آنے والے ایک ٹپر نے تیز رفتاری سے کار کو ٹکر مار دی۔ ٹکر کے بعد ٹپر گاڑی کو کچھ فاصلے تک گھسیٹتا رہا۔ کار ٹپر کے نیچے آنے سے لاشیں کچل گئیں۔ مہلوکین میں چار مرد ، دو خواتین اور ایک بچہ شامل ہے۔ کار نیلور سے کڑپہ جارہی تھی۔حادثے کی اطلاع ملتے ہی پولیس نے موقع پر پہنچ کر امدادی کارروائیاں شروع کر دیں۔ لاشوں کو پوسٹ مارٹم کے لیے مقامی اسپتال منتقل کردیا گیا۔ پولیس کا کہنا ہے کہ واقعہ کا مقدمہ درج کر لیا گیا ہے اور حادثے کی تحقیقات کی جا رہی ہے۔
حادثہ اس وقت پیش آیا جب کار آتماکور کے ایک سرکاری اسپتال کی طرف جارہی تھی۔ مہلوکین کی شناخت ٹی رادھا، سیشم سرما، نلگنڈہ لکشمی، شیشم تیجا اور سری نواسولو کے طور پر کی گئی ہے، باقی متاثرین کی مزید شناخت باقی ہے۔ یہ کار تلور رادھا کے نام پر رجسٹرڈ ہے اور خیال کیا جاتا ہے کہ ہلاک ہونے والے نیلور کے ضلع ہیڈکوارٹر میں متوکور گیٹ کے قریب گروموری گلی کے رہنے والے تھے۔ لاشوں کو نکالنے کے لیے ہنگامی خدمات فوری طور پر جائے وقوعہ پر پہنچ گئیں، جنہیں بعد ازاں پوسٹ مارٹم کے لیے مقامی اسپتال منتقل کیا گیا۔
پولیس فی الحال حادثے کے حالات کی تحقیقات کر رہی ہے اور باقاعدہ مقدمہ درج کر لیا ہے۔ اس واقعہ کی روشنی میں وزیر ٹرانسپورٹ منڈی پلی رام پرساد ریڈی نے سوگوار خاندانوں سے اظہار تعزیت کیا اور حکم دیا کہ کسی بھی زخمی فرد کو ہنگامی طبی امداد فراہم کی جائے۔ انہوں نے ٹرانسپورٹ حکام پر زور دیا ہے کہ وہ ضروری حفاظتی اقدامات پر عمل درآمد کریں اور سڑک کی حفاظت کے ضوابط پر عمل کرنے کی اہمیت پر زور دیتے ہوئے لاپرواہی کے خلاف انتباہ دیا ہے۔ اسی طرح ریاستی سڑکوں اور عمارتوں، سرمایہ کاری اور انفراسٹرکچر کے وزیر بی سی جناردھن ریڈی نے حادثے پر اپنی گہری تشویش کا اظہار کیا اور متاثرہ خاندانوں کے تئیں اپنی دلی ہمدردی کا اظہار کرتے ہوئے انہیں یقین دلایا کہ حکومت اس المناک وقت میں مدد فراہم کرے گی۔
