وزیر اعظم نریندر مودی کی اپیل کے بعد پیر کے روز زیورات (جولری) کمپنیوں کے شیئرز میں بھاری گراوٹ دیکھنے کو ملی ہے۔ ٹائٹن، کلیان جولرز، سینکو گولڈ، اسکائی گولڈ اور دیگر کمپنیوں کے شیئرز 5 سے 12 فیصد تک گرگئے۔ ٹائٹن کے شیئرز تقریباً 6 فیصد اور کلیان جولرز کے شیئرز 8 فیصد سے زیادہ گر گئے۔ سرمایہ کاروں میں تشویش بڑھنے سے مارکیٹ میں فروخت تیزی سے ہوئی۔ اس کا اثر زیورات کے کاروبار سے وابستہ متعدد کمپنیوں پر واضح طور پر نظر آیا۔
مودی کی اپیل کا اثر:
وزیر اعظم مودی نے اتوار کو عوام سے غیر ملکی زر مبادلہ(Foreign Exchange)بچانے کی اپیل کی تھی۔ انہوں نے کہا تھا کہ مغربی ایشیا میں جاری بحران کو دیکھتے ہوئے لوگوں کو اگلے ایک سال تک شادی کے لیے سونا خریدنے سے گریز کرنا چاہیے۔ اس کے ساتھ ہی انہوں نے پٹرول-ڈیزل اور گیس کے استعمال میں بھی سوچ سمجھ کر احتیاط کرنے کی ہدایت کی۔ وزیر اعظم کی اس اپیل کے بعد مارکیٹ میں یہ خوف بڑھ گیا کہ سونے کی طلب کم ہو سکتی ہے۔
اچھے نتائج کے باوجود مارکیٹ ٹوٹی:
زیورات کمپنیوں نے حال ہی میں اچھے کاروباری نتائج پیش کیے تھے، مگر اس کے باوجود ان کے شیئرز گر گئے۔ ٹائٹن کا منافع ایک سال میں 35 فیصد بڑھ کر 1,179 کروڑ روپے تک پہنچ گیا۔ جبکہ کمپنی کی کل آمدنی بھی کافی بڑھی۔ کلیان جولرز کا منافع بھی 118 فیصد بڑھ کر 409 کروڑ روپے سے زیادہ ہو گیا۔ سرمایہ کاروں کو تشویش ہے کہ سونے کی خریداری کم ہونے سے آنے والے وقت میں کاروبار متاثر ہو سکتا ہے۔
مارکیٹ میں آئندہ بھی ہلچل رہ سکتی ہے:
زیورات کی مارکیٹ میں آنے والے دنوں میں اتار چڑھاؤ جاری رہ سکتا ہے۔ مغربی ایشیا میں بڑھتے تناؤ اور سونے کی بلند قیمتوں نے پہلے ہی مارکیٹ پر دباؤ بڑھا دیا ہے۔ اب حکومت کی بچت والی اپیل نے بھی سرمایہ کاروں کی تشویش میں اضافہ کر دیا ہے۔ تاہم، کئی بڑی کمپنیاں اپنے کاروبار کو مضبوط بتا رہی ہیں اور نئے شہروں میں توسیع کر رہی ہیں۔ اس کے باوجود فی الحال مارکیٹ میں احتیاط کا ماحول بنا ہوا ہے۔
