جموں و کشمیر میں سیکیورٹی ایجنسیوں نے پاکستان کی جانب سے ڈرون کے ذریعے منشیات بھیجنے کی ایک بڑی سازش کو ناکام بنا دیا ہے۔ دو دن کے اندر ڈرون کے ذریعے گرائی گئی دو بڑی کھیپیں برآمد کی گئی ہیں۔ اس واقعے کے بعد پاکستان کی ایک اور ناپاک سازش بے نقاب ہوئی ہے اور معلوم ہوا ہے کہ اب اسلحہ کےعلاوہ منشیات بھی بھیجی جا رہی ہیں۔ کل کٹھوعہ پولیس نے پاکستانی ڈرون کے ذریعے گرائی گئی ہیروئن کے ساتھ دو ملزمان کو گرفتار کیا تھا۔ جانچ میں سامنے آیا ہے کہ گرفتار ملزمان انٹرنیٹ کالز کے ذریعے پاکستانی ہینڈلرز کے رابطے میں تھے۔
بھاری مقدارمیں منشیات ضبط
حکام نے پاک بھارت سرحد کے آر ایس پورہ سیکٹر میں 40 کروڑ روپے سے زائد مالیت کی 6.5 کلو گرام ہیروئن ضبط کی ہے۔ شبہ ہے کہ یہ ممنوعہ سامان پاکستان سے آنے والے ڈرون نے گرایا۔ مقامی لوگوں نے جمعہ کی رات مشتبہ ڈرون کی نقل و حرکت دیکھی اور حکام کو اطلاع دی۔ مقامی لوگوں نے انہیں بتایا کہ ڈرون نے کوئی مادہ گرایا ہے۔اس کے بعد پولیس نے بی ایس ایف کے دستوں کے ساتھ مل کر علاقے کا معائنہ کیا۔ مقامی کھیتوں سے بھاری مقدار میں ہیروئن برآمد ہوئی۔ اس کی کل مالیت 40 کروڑ روپے سے زیادہ بتائی جاتی ہے۔ پولیس نے مقدمہ درج کر کے تفتیش شروع کر دی۔
بی ایس ایف اور جےکےپولیس کا مشترکہ آپریشن
جموں کے آر ایس پورہ سیکٹر میں بی ایس ایف اور جموں و کشمیر پولیس نے مشترکہ آپریشن چلا کر ڈرون کے ذریعے گرائی گئی ایک اور بڑی کھیپ برآمد کی۔ اس مشترکہ کارروائی میں 4 کلوگرام سے زائد ہیروئن برآمد ہوئی ہے، جس کی بین الاقوامی مارکیٹ میں قیمت 20 کروڑ روپے سے زیادہ بتائی جا رہی ہے۔ فی الحال آر ایس پورہ کے بین الاقوامی سرحدی علاقے میں بی ایس ایف اور جموں و کشمیر پولیس کی جانب سے بڑے پیمانے پر تلاشی مہم جاری ہے۔
دوافراد گرفتار
دوسری طرف، پولیس نے کٹھوعہ ضلع کے سرحدی علاقوں میں ڈرون کے ذریعے پاکستان سے غیر قانونی طور پر ہیروئن لے جانے کے الزام میں دو افراد کو گرفتار کیا ہے۔ ان کی شناخت پنجاب کے پٹھان کوٹ کے جتن اور کٹھوعہ کے جکھبر کے رہنے والے دانش ڈوگرہ کے طور پر ہوئی ہے۔ ان کے پاکستانی سمگلروں کے ساتھ روابط کے بارے میں جانا جاتا ہے۔ جتن کی نشاندہی پر کٹھوعہ پولیس نے دانش ڈوگرا عرف ساجن کو حراست میں لیا۔ جیسے جیسے جانچ کا دائرہ وسیع ہوگا، پاکستان کے سفید نشے کے اس نیٹ ورک میں شامل کئی اور افراد کی گرفتاری کا امکان ہے۔
سرحد پرسخت سیکیورٹی
پاکستانی سرحد سے ملحقہ علاقوں میں جموں و کشمیر پولیس اور سیکیورٹی ایجنسیاں مسلسل چھاپے مار رہی ہیں۔ وہیں ہندوستانی فوج بھی پوری مستعدی کے ساتھ دراندازوں پر نظر رکھے ہوئے ہے۔ پہلگام حملے کے بعد پاک سرحد پر سیکیورٹی مزید سخت کر دی گئی ہے، اور اس کے بعد ہندوستانی فوج نے درجنوں انکاؤنٹر کیے ہیں اور مشتبہ افراد کو گرفتار کیا ہے۔
