تلنگانہ حکومت 15 اگست سے یوم آزادی کی تقریبات کے موقع پر ریاست بھر میں 1.05 کروڑ نئے جاری کردہ لیمینیٹڈ پبلک ڈسٹری بیوشن سسٹم (PDS) راشن کارڈس کی تقسیم شروع کرے گی۔ریاست گیر تقسیم پروگرام کا باضابطہ آغاز چیف منسٹر اے ریونت ریڈی سنگاریڈی میں کریں گے جبکہ اسی طرح کی تقریبات تمام 119 اسمبلی حلقوں میں بیک وقت منعقد کی جائیں گی۔
اس پہل کا اعلان کرتے ہوئے، آبپاشی، خوراک اور شہری رسد کے وزیر کیپٹن این اتم کمار ریڈی نے کہا کہ اس پروگرام کا مقصد ریاست کے ہر مستحق غریب خاندان کے لیے غذائی تحفظ کو مضبوط بنانا ہے اور اس بات کو یقینی بنانا ہے کہ نئے اہل مستفید افراد کو عوامی تقسیم کے نظام اور دیگر فلاحی اسکیموں کے فوائد حاصل ہوں۔
وزیر نے کہا کہ ایک سرکاری میمو جاری کیا گیا ہے جس میں ضلعی انتظامیہ کو ہدایت کی گئی ہے کہ وہ تقسیم مہم کے لیے جامع انتظامات کریں۔ ریونیو ڈویژنل افسران (RDOs) کو اپنے اپنے حلقوں میں پروگرام کو مربوط کرنے کا کام سونپا گیا ہے۔ انھوں نے حکام کو ہدایت دی کہ وہ مستحقین کی فہرستوں کو حتمی شکل دینے سے لے کر کارڈز کی پرنٹنگ، ٹرانسپورٹیشن، تقسیم مراکز کے انتظامات، عوامی سہولیات، میڈیا پبلسٹی، فوٹو گرافی، اور ویڈیو گرافی تک تمام انتظامات کو جامع طریقے سے مکمل کیا جائے۔
یوم آزادی کی سرکاری تقریبات کی روشنی میں حکومت نے راشن کارڈ کی تقسیم 15 اگست کو دوپہر 2 بجے سے شام 4 بجے تک مقرر کی ہے۔عہدیداروں کو ہدایت دی گئی ہے کہ وہ تمام تیاری کے کاموں کو مکمل کریں جس میں مستفید ہونے والوں کی فہرستوں کو حتمی شکل دینا، راشن کارڈ کی پرنٹنگ اور نقل و حمل، تقسیم کے مراکز کا قیام اور مناسب عوامی سہولیات کو یقینی بنانا شامل ہے۔
جدید اسمارٹ راشن کارڈ
اس سے پہلے یہ خبر آئی تھی کہ ریاست بھر میں کاغذ کے روایتی راشن کارڈس کی جگہ اب کریڈٹ اور ڈیبٹ کارڈ سائز کے جدید اسمارٹ راشن کارڈس تقسیم کئے جا رہےہیں۔ بتایا گیا کہ یہ نیا کارڈ بالکل بینک کے اے ٹی ایم یا کریڈٹ کارڈ جیسا ہوگا جس پر کارڈ ہولڈر کا نام، پتہ اور تصویر موجود ہوگی اس کے ساتھ ہی کارڈ پر چیف منسٹر اے ریونت ریڈی اور ریاستی وزیر سیول سپلائز این اتم کمار ریڈی کی تصاویر بھی پرنٹ کی گئی ہیں۔ کارڈ پر ایک مخصوص QR کوڈ دیا گیا ہے۔ اس کوڈ کو اسکیان کرتے ہی خاندان کے تمام مستفید ارکان کی تفصیلات اور اب تک اٹھائے گئے راشن کا پورا ریکارڈ اسکرین پر ظاہر ہوجائے گا۔ راشن کارڈ پر QR کوڈ اسکیان کرکے یا صرف کارڈ نمبر درج کرکے خاندان کا کوئی بھی فرد بائیومیٹرک (انگوٹھے کا نشان) دے کر راشن حاصل کرسکے گا۔ ڈیجیٹل نظام کو مانیٹر کرنے کیلئے محکمہ سیول سپلائز نے ایک موبائیل اپلی کیشن بھی متعارف کرایا ہے۔
