'ہر گھر ترنگا' مہم کے ایک حصے کے طور پر بدھ کو جموں و کشمیر میں ہزاروں لوگوں نے ترنگا یاترا میں حصہ لیا، قومی پرچم اٹھائے اور یوم آزادی سے قبل حب الوطنی کے جذبے کا اظہار کیا۔ اننت ناگ، بانڈی پورہ اور سری نگر میں میگا ریلیوں کا انعقاد کیا گیا، جس میں طلباء، رہائشیوں، عوامی نمائندوں، پولیس اہلکاروں اوردیگر اہلکاروں کو اکٹھا کیا گیا۔
قبل ازیں صبح لیفٹیننٹ گورنر منوج سنہا نے سری نگر کے شیر کشمیر انٹرنیشنل کنونشن سینٹر (SKICC) سے ترنگا یاترا کو جھنڈی دکھا کر روانہ کیا۔ انہوں نے کہا کہ 'ہر گھر ترنگا' مہم لوگوں کے شعور اور قومی محبت کے ایک تہوار کے طور پر تیار ہوئی ہے، جس نے لوگوں سے ترنگا کی روح کو نہ صرف چھتوں پر بلکہ اپنے خیالات، کردار اور عمل میں بھی بلند رکھنے کی اپیل کی ہے۔ انہوں نے کہا"واقعی ایک تاریخی دن! ترنگا یاترا میں شامل ہونے اور آج سری نگر میں عوام سے خطاب کرنے پر فخر ہے۔ اس مقدس سرزمین پر ترنگا ہندوستان کے زندہ ضمیر کے طور پر بلند ہے اور وندے ماترم اس کی لافانی آواز کے طور پر گونج رہا ہے۔ یہ ہماری مشترکہ طاقت، اتحاد اور غیر متزلزل حب الوطنی کو مجسم کرتا ہے،"۔
اننت ناگ میں، ضلع انتظامیہ نے مہم کے ایک حصے کے طور پر ایک میگا ترنگا یاترا کا اہتمام کیا، جس میں ہزاروں شرکاء ضلع میں ترنگا لے کر روانہ ہوئے۔ اس تقریب کا مقصد شہریوں کو یوم آزادی کی تقریبات میں شرکت کی ترغیب دینا اور قومی اتحاد کے جذبے کو تقویت دینا تھا۔
بانڈی پورہ میں منی سیکرٹریٹ سے اسپورٹس اسٹیڈیم تک ایک میگا ترنگا ریلی نکالی گئی جس میں ہزاروں طلباء اور مقامی باشندوں نے شرکت کی۔ عوامی نمائندے، جموں و کشمیر پولیس کے اہلکار اور سینٹرل ریزرو پولیس فورس (CRPF) کے اہلکار بھی ریلی میں شامل ہوئے۔ اس پروگرام میں شریک ایک طالب علم نے کہا، ’’آج بانڈی پورہ میں ڈی سی آفس سے ایس کے اسٹیڈیم تک ترنگا ریلی نکالی جارہی ہے۔‘‘
سری نگر میں، وقف بورڈ کے چیئرپرسن درخشاں اندرابی نے ترنگا ریلی میں کشمیر بھر سے لوگوں کی پرجوش شرکت پر روشنی ڈالی۔انہوں نے کہا، "آج یہاں لیفٹیننٹ گورنر منوج سنہا کی قیادت میں ترنگا ریلی نکالی گئی، جس میں کشمیر بھر سے لوگ، خاص طور پر کشمیر کے تمام اضلاع کے بچے اور بیوروکریٹس نے شرکت کی۔ ترنگا صرف لوگوں کے ہاتھوں میں نہیں لہرایا جا رہا ہے، آپ آج سب کے دلوں میں جوش اور جذبہ دیکھ سکتے ہیں۔"
بی جے پی کے جنرل سیکریٹری انور خان نے ڈورو اننت ناگ میں ایک شاندار 'ترنگا ریلی' کی قیادت کرتے ہوئے جموں و کشمیر کی مجموعی امن و امان کی صورتحال میں نمایاں بہتری کا دعویٰ کیا ہے۔کولگام واقعے پر بات کرتے ہوئے انہوں نے کہا کہ کشمیر میں ہڑتالوں اور بدامنی کا دور اب ختم ہو چکا ہے اور حالیہ نوعیت کے واقعات محض چند الگ تھلگ واقعات تک محدود ہیں۔انور خان نے مخالف سیاسی جماعتوں پر تنقید کرتے ہوئے الزام لگایا کہ بعض عناصر اپنے سیاسی ایجنڈے کو چمکانے کے لیے ان اکادکا واقعات کو سیاسی فائدے کے لیے استعمال کر رہے ہیں۔
ہر گھر ترنگا مہم کے سلسلے میں ضلع ترقیاتی کمشنر بڈگام اتھر عامر خان اور سینئر سپرنٹنڈنٹ آف پولیس (ایس ایس پی) بڈگام ہری پرساد کے کے نے آج اسپورٹس اسٹیڈیم بڈگام سے ایک بڑی موٹر سائیکل ریلی اور سائیکل ریلی کو جھنڈی دکھا کر روانہ کیا۔ ان ریلیوں میں ضلع بھر سے سینکڑوں بائیک سواروں اور سائیکل سواروں نے جوش و خروش کے ساتھ شرکت کی۔
ڈپٹی کمشنر گاندربل جتن کشور نے منی سیکریٹریٹ میں پبلک لیٹرین بلاک کا افتتاح کرنے کے ساتھ ساتھ 'ہر گھر ترنگا' مہم کے تحت ایک صفائی مہم کی قیادت کی ہے۔ڈی سی نے اعلان کیا کہ کل منی سیکریٹریٹ سے قمریہ اسٹیڈیم تک ایک میگا ترنگا ریلی نکالی جائے گی، جس میں انہوں نے عام لوگوں کو بڑھ چڑھ کر حصہ لینے کی دعوت دی ہے۔انہوں نے مزید بتایا کہ وندے ماترم کے 150 سال مکمل ہونے کے سلسلے میں ضلع بھر میں متعدد حب الوطنی کے پروگرام منعقد کیے جا رہے ہیں تاکہ نوجوانوں میں قومی جذبے کو فروغ دیا جا سکے۔
یومِ آزادی کی مناسبت سے ضلع انتظامیہ پونچھ کی جانب سے 'ہر گھر ترنگا' مہم اور وندے ماترم کے 150 سال مکمل ہونے پر 9 سے 17 اگست تک ایک ہفتہ وار پروگرام کا انعقاد کیا گیا ہے۔اس خصوصی مہم میں عام لوگوں اور انتظامیہ کے افسران سمیت بالخصوص اسکول و کالج کے بچوں نے بڑی تعداد میں شرکت کر کے حب الوطنی کا شاندار مظاہرہ کیا ہے۔ڈی سی پونچھ اشوک کمار شرما نے بچوں کے جوش و خروش کو سراہتے ہوئے امید ظاہر کی ہے کہ عوام کے تعاون سے 17 اگست تک چلنے والے تمام پروگرام کامیابی سے ہمکنار ہوں گے۔
تحصیل آفس پانپور نے 'ہر گھر ترنگا مہم 2026' کے تحت ایک میگا ترنگا ریلی کا انعقاد کیا، جس کی صدارت تحصیلدار ملک آصف احمد نے کی اور اس میں پولیس، سی آر پی ایف، طلبہ اور سول سوسائٹی کے سینکڑوں افراد نے شرکت کی۔تحصیل آفس سے شروع ہوکر مختلف علاقوں سے گزرنے والی اس ریلی میں شرکاء نے قومی پرچم لہراتے ہوئے حب الوطنی اور قومی یکجہتی کے جذبے کا شاندار اظہار کیا۔
ضلع ہیڈکوارٹر کشتواڑ میں ایم ایل اے شگن پریہار اور ڈپٹی کمشنر پنکج کمار شرما کی قیادت میں ایک عظیم الشان ترنگا ریلی نکالی گئی، جس میں سول سوسائٹی، سرکاری ملازمین اور طلباء سمیت تقریباً 15,000 افراد نے شرکت کی۔ ڈاک بنگلہ چوک سے شروع ہو کر چوگان گراؤنڈ پر اختتام پذیر ہونے والی اس ریلی میں شرکاء نے ہاتھوں میں قومی پرچم تھامے حب الوطنی کے نعرے بلند کر کے یکجہتی کا شاندار مظاہرہ کیا۔
ضلع کولگام کے ڈی ایچ پورا میں ایس ڈی ایم بشیر الحسن اور ایس ڈی پی او ریاض احمد کی قیادت میں ایک عظیم الشان ترنگا ریلی نکالی گئی، جس میں طلباء، سول سوسائٹی اور سرکاری ملازمین نے بڑی تعداد میں شرکت کی۔اس ریلی کی سب سے بڑی اور انوکھی خصوصیت اسکولی بچوں کی جانب سے اٹھایا گیا 800 میٹر طویل قومی پرچم تھا، جو گورنمنٹ ڈگری کالج سے شروع ہو کر ایس ڈی ایم آفس پر اختتام پذیر ہوا۔
یو ٹی لداخ کے ضلع دراس میں 'ہر گھر ترنگا مہم' کے تحت اب تک کی سب سے بڑی اور شاندار ترنگا ریلی کا انعقاد کیا گیا، جس کی قیادت ڈپٹی کمشنر کاچو امتیاز احمد خان اور ایس پی کاچو اشتیاق احمد خان نے کی۔ڈی میڈوز سے شروع ہو کر ڈاک بنگلہ پر اختتام پذیر ہونے والی اس تاریخی ریلی میں سرکاری افسران، پولیس، طلبہ اور مختلف مذہبی برادریوں کے رہنماؤں نے ہاتھوں میں ترنگا تھامے قومی اتحاد اور حب الوطنی کا بے مثال پیغام دیا۔
یہ ریلیاں وسیع تر 'ہر گھر ترنگا' مہم کا حصہ ہیں، جو شہریوں کو ترنگا گھر لانے اور یوم آزادی کی تقریبات کے حصے کے طور پر لہرانے یا ڈسپلے کرنے کی ترغیب دینے کے لیے شروع کی گئی ہے۔ اس مہم کا مقصد حب الوطنی کے جذبے اور تقریبات میں شرکت کے ساتھ شہریوں اور قومی پرچم کے درمیان تعلق کو گہرا کرنا ہے۔
آزادی کا امرت مہوتسو کے تحت 2022 میں شروع کی گئی ہر گھر ترنگا مہم ایک ملک گیر عوامی تحریک میں تبدیل ہو گئی ہے، جس میں یوم آزادی سے قبل ملک بھر میں ترنگا یاترا اور دیگر سرگرمیاں منعقد کی جاتی ہیں۔
