کانگریس نے مہاراشٹر کے ضلع ستارا میں اڈانی گروپ کی ذیلی کمپنی اڈانی گرین انرجی لمیٹڈ کے مجوزہ ہائیڈرو پاور منصوبے کی لاگت میں مبینہ ہیرا پھیری پر سخت سوالات اٹھائے ہیں۔ پارٹی نے انگریزی روزنامے ’دی انڈین ایکسپریس‘ کی ایک رپورٹ کا حوالہ دیتے ہوئے الزام لگایا ہے کہ 1500 میگاواٹ کے تارلی پمپڈ اسٹوریج پاور پروجیکٹ کی لاگت 5675 کروڑ روپے سے کم کرکے صرف 56.75 کروڑ روپے ظاہر کی گئی۔ کانگریس کے مطابق اس تبدیلی کے نتیجے میں جنگلی حیات کے تحفظ کے لیے واجب الادا رقم بھی تقریباً 227 کروڑ روپے سے گھٹ کر 2.27 کروڑ روپے رہ گئی۔ کانگریس کا کہنا ہے کہ یہ منصوبہ سہیادری ٹائیگر ریزرو کے دائرے میں آتا ہے، جہاں محکمہ جنگلات کے قواعد کے تحت منصوبے کی کل لاگت کا 4 فیصد حصہ جنگلات اور جنگلی حیات کے تحفظ کے لیے جمع کرانا ضروری ہے۔
لاگت میں اعشاریہ لگا کر رقم کم دکھانے کا الزام
کانگریس نے اپنے آفیشل ایکس ہینڈل پر انڈین ایکسپریس ہندی کی ایک مختصر ویڈیو شیئر کرتے ہوئے الزام لگایا کہ کمپنی نے منصوبے کی لاگت کے اعداد و شمار میں اعشاریہ لگا کر رقم کم ظاہر کی، تاکہ تحفظِ جنگلی حیات کے لیے واجب الادا کروڑوں روپے کی ادائیگی سے بچا جا سکے۔ پارٹی کے مطابق اڈانی گرین انرجی نے ابتدا میں منصوبے کی لاگت 5675 کروڑ روپے بتائی تھی۔ اس رقم کا 4 فیصد تقریباً 227 کروڑ روپے بنتا ہے، جو سہیادری ٹائیگر ریزرو کے اکاؤنٹ میں جمع ہونا چاہیے تھا۔ لیکن کانگریس کا دعویٰ ہے کہ بعد میں سرکاری فائلوں میں اسی منصوبے کی لاگت 56.75 کروڑ روپے درج کر دی گئی، جس کے نتیجے میں واجب الادا رقم بھی کم ہو کر تقریباً 2.27 کروڑ روپے رہ گئی۔
کانگریس کا طنز، 56 کروڑ میں 1500 میگاواٹ کا منصوبہ کیسے؟
کانگریس نے اس معاملے پر طنزیہ انداز اختیار کرتے ہوئے کہا کہ شاید دنیا میں یہ اپنی نوعیت کی واحد مثال ہوگی جہاں صرف 56.75 کروڑ روپے میں 1500 میگاواٹ کا ہائیڈرو پاور منصوبہ تیار کیا جا رہا ہو۔ پارٹی نے مزید الزام لگایا کہ منصوبے کی لاگت میں مبینہ ہیرا پھیری کے ذریعے تقریباً 225 کروڑ روپے کی بچت کی گئی، جبکہ محکمہ جنگلات نے بھی ان اعداد و شمار کو قبول کرکے اس معاملے میں عملاً کمپنی کا ساتھ دیا۔
وزیر اعظم مودی پر بھی تنقید
کانگریس نے اس معاملے کو لے کر وزیر اعظم نریندر مودی کو بھی نشانہ بنایا۔ پارٹی کا الزام ہے کہ حکومت نے اڈانی گروپ کو کھلی چھوٹ دے رکھی ہے، جس کی وجہ سے اس طرح کے معاملات سامنے آ رہے ہیں۔ رپورٹ کے مطابق یہ الزامات میڈیا کی تحقیقات کی بنیاد پر سامنے آئے ہیں۔ تاہم، اس معاملے پر اڈانی گروپ یا محکمہ جنگلات کا باضابطہ ردعمل رپورٹ میں شامل نہیں تھا۔ لہٰذا منصوبے کی اصل لاگت، سرکاری ریکارڈ میں درج اعداد و شمار اور مبینہ بے ضابطگیوں کی مکمل حقیقت متعلقہ فریقوں کے جواب اور سرکاری جانچ کے بعد ہی واضح ہو سکے گی۔
