دیوالی کی روشنیوں بھری رات ملک کے کئی خاندانوں کے لیے ایک بھیانک سانحے میں بدل گئی۔ مختلف ریاستوں میں آگ لگنے اور پٹاخوں سے متعلق حادثات کے نتیجے میں مجموعی طور پر تقریباً 30 افراد کی جان چلی گئی۔ یہ واقعات اتوار اور پیر کی درمیانی شب سے پیر کی صبح تک مختلف شہروں اور قصبوں میں پیش آئے، جب لوگ دیوالی کا جشن منانے میں مصروف تھے۔
حکام کے مطابق ان حادثات کی وجوہات مختلف تھیں۔ کہیں شارٹ سرکٹ، کہیں پٹاخوں کی چنگاری اور کہیں دکانوں یا مکانوں میں رکھے آتش گیر سامان نے آگ کو بھڑکا دیا۔ کئی مقامات پر لوگ گھروں کے اندر پھنس گئے، جس کے باعث ان کا دم گھٹ گیا یا وہ آگ کی لپیٹ میں آکر بری طرح جھلس گئے۔
مدھیہ پردیش میں تین حادثات، متعدد افراد ہلاک
مدھیہ پردیش کے ضلع کٹنی کے علاقے برہی میں دیوالی کی رات تقریباً 12 بجے پورن اگروال کی کراکری کی دکان میں اچانک آگ لگ گئی۔ دیکھتے ہی دیکھتے آگ نے تین منزلہ عمارت کو اپنی لپیٹ میں لے لیا۔ عمارت میں موجود اہل خانہ کو باہر نکلنے کا موقع نہیں ملا اور اس حادثے میں 77 سالہ پورن اگروال، ان کی اہلیہ چندرکلا، بہو پونم، 14 سالہ آریہ، 6 سالہ انوی اور صرف دو ماہ کا بچہ ہلاک ہوگئے۔
ریسکیو اور امدادی کارروائی رات بھر جاری رہی۔ فائر بریگیڈ اور انتظامیہ کی ٹیموں نے بڑی مشقت کے بعد صبح تقریباً ساڑھے چار بجے پورن اگروال کی لاش نکالی، جبکہ صبح ساڑھے چھ بجے جے سی بی کی مدد سے دیوار توڑ کر باقی پانچ افراد کو باہر نکالا گیا۔
اسی ریاست کے ضلع سیونی کے علاقے چھپارا میں پیر کی علی الصبح تقریباً تین بجے جین محلہ کے صرافہ تاجر کندن سونی کے مکان میں آگ لگ گئی۔ امدادی ٹیموں نے گھر سے چھ افراد کو باہر نکالا، لیکن ان میں سے پانچ کی جان نہیں بچائی جاسکی۔
ادھر اجین کے ناگ جھری علاقے میں ایک دو منزلہ عمارت کے نچلے حصے میں واقع دکانوں میں آگ بھڑک اٹھی۔ اوپری منزل پر پھنسے 10 افراد کو مقامی لوگوں، پولیس اور میونسپل ٹیم کی مدد سے بحفاظت نکال لیا گیا، تاہم 107 سالہ بزرگ کی جان نہ بچائی جاسکی۔
مہاراشٹر میں آگ کے 70 سے زائد واقعات
مہاراشٹر میں دیوالی کے دوران آگ لگنے کے کم از کم 70 واقعات سامنے آئے، جن میں سے تقریباً 50 پمپری چنچواڑ میں رپورٹ ہوئے۔ ضلع دھاراشیو کے یدشی گاؤں میں ایک جنرل اسٹور اور اس کے اوپر بنے مکان میں دیوالی کی رات خوفناک آگ لگ گئی۔ آگ سے اٹھنے والے زہریلے دھوئیں اور شدید تپش کے باعث ایک ہی خاندان کے چھ افراد کا دم گھٹ گیا اور وہ بری طرح جھلس گئے۔ اس حادثے نے پورے علاقے میں غم کی فضا پیدا کردی۔
ممبئی کے اندھیری ویسٹ میں لوکھنڈوالا کی ایک بلند عمارت میں بھی آگ لگنے کا واقعہ پیش آیا، جس میں ایک شخص کی موت ہوگئی۔ دوسری جانب پونے میں دیوالی کے دوران آگ لگنے کے 63 واقعات درج کیے گئے، تاہم وہاں ان حادثات میں ہونے والی اموات کی تعداد فوری طور پر سامنے نہیں آسکی۔
جشن کے دوران حفاظتی انتظامات پر سوال
دیوالی کے موقع پر پیش آنے والے ان حادثات نے ایک بار پھر آتش بازی کے دوران احتیاط، گھروں اور دکانوں میں آتش گیر سامان کے ذخیرے اور ہنگامی حالات سے نمٹنے کے انتظامات پر سوال کھڑے کردیے ہیں۔ چند لمحوں کی خوشی کئی خاندانوں کے لیے عمر بھر کا غم بن گئی۔
