بھارتی ریاست اتر پردیش کے ضلع سنبھل کے علاقے اسمؤلی (Asmoli) کے گاؤں قطب پور سٹہ (Qutubpur Satta) میں 12 نومبر 2026 کو ضلعی انتظامیہ نے ایک مبینہ غیر قانونی زیرِ تعمیر مسجد کو شہید کر دیا گیا ۔ یہ کارروائی سب ڈویژنل مجسٹریٹ (SDM) کے احکامات پر عمل میں لائی گئی، جس کے دوران علاقے میں سیکیورٹی کے انتہائی سخت انتظامات کیے گئے تھے۔ انتظامیہ کے مطابق یہ قدم تحصیل سطح کی جانچ اور متعلقہ احکامات کے بعد اٹھایا گیا تاکہ عوامی استعمال کی زمین کو بازیاب کرایا جا سکے۔
اسمولی کے سرکل آفیسر امان سنگھ نے بتایا کہ مقامی رہائشیوں نے ایک ماہ سے کچھ زائد عرصہ پہلے پولیس اور مقامی حکام کو اطلاع دی تھی کہ گاؤں کی عوامی زمین پر مسجد کی نئی تعمیر ہورہی ہے۔ اس اطلاع کے بعد پولیس اور محکمہ رینو کی مشترکہ ٹیم نے موقع کا معائنہ کیا اور تعمیری ڈھانچے کو قواعد کے خلاف پایا۔ سی او کے مطابق ابتدائی جانچ کے بعد معاملہ تحصیلی سطح پر پیش ہوا جہاں سب ڈویژنل مجسٹریٹ سنبھل نے تعمیری کام کو غیرقانونی قرار دیتے ہوئے اسے منہدم کرنے کا تحریری حکم نامہ جاری کیا۔
حکام نے بتایا کہ مسماری کے دوران نظم و نسق کی برقراری کے لیے مقامِ واقعہ پررینو افسران کے ساتھ پولیس کی بھاری نفری موجود رہی۔ چار تھانوں کے انچارج اور 10 تھانوں کے عملے کو تعینات کیا گیا، جب کہ صوبائی آرمڈ کانسٹیبلری کی ایک پلاٹون بھی موقع پر رہی۔ چونکہ یہ جگہ گنجان آباد آبادی کے قریب ہے، اس لیے نگرانی کو مستحکم بنانے کے لیے بعض اہلکاروں کو قریبی عمارتوں کی چھتوں پر بھی متعین کیا گیا۔
افسران نے مزید بتایا کہ کسی بھی اشتعال یا ہنگامہ آرائی کو روکنے اور کاروائی کو پرامن رکھنے کے لیے ڈرون کیمروں سے فضائی نگرانی بھی کی جارہی ہے۔ سی او امان سنگھ کے مطابق حکم کی تعمیل میں تمام مراحل ضابطے کے مطابق انجام دیے جارہے ہیں اور موقع پر موجود ٹیمیں کسی بھی ہنگامی صورتِ حال سے نمٹنے کے لیے تیار ہیں۔
مقامی سطح پر اس معاملے کی جڑ یہ بتائی گئی کہ زیرِ بحث قطعہ اراضی سرکاری ریکارڈ میں عوامی استعمال کے لیے مختص ہے، اس لیے نئی تعمیرات کے لیے قانونی منظوری اور متعلقہ دستاویزات ضروری تھیں۔ حکام کا کہنا ہے کہ جب دیکھ بھال کرنے والے فریق سے ثبوتِ ملکیت اور اجازت نامہ مانگا گیا تو مطلوبہ دستاویزات بروقت پیش نہ کیے جا سکے، جس کے بعد قانونی کاروائی ناگزیر ہوگئی۔
انتظامیہ نے واضح کیا کہ مسماری کے دوران شہریوں کی نقل و حرکت کو غیر ضروری طور پر متاثر نہ کرنے کی ہدایات دی گئی ہیں، تاہم احتیاطی طور پر داخلی راستوں پر ناکے اور رکاوٹیں قائم کی گئی ہیں۔ پولیس نے مقامی افراد سے اپیل کی ہے کہ افواہوں سے گریز کریں اور اطلاعات کے لیے صرف سرکاری ذرائع پر انحصار کریں۔
یہ کاروائی ایک ایسے وقت میں ہوئی جب ریاست میں سرکاری اراضی پر غیر مجاز تعمیرات کے خلاف مہم جاری ہے۔ حکام کا دعویٰ ہے کہ اس طرح کے اقدامات قانون کی یکساں عمل آوری کو یقینی بنانے اور عوامی مفاد کے تحفظ کے لیے کیے جا رہے ہیں۔ اس دوران کسی گرفتاری یا جھڑپ کی اطلاع موصول نہیں ہوئی، اور انتظامیہ نے کہا ہے کہ صورتِ حال قابو میں ہے اور کاروائی مکمل ہونے تک نگرانی کا سلسلہ جاری رہے گا۔
