آندھرا پردیش کے دارالحکومت امراوتی کی تعمیر میں ایک اور اہم سنگ میل کا مرحلہ طے ہوگیا ہے۔ امراوتی کو ریاست میں اقتصادی سرگرمیوں کا مرکز بنانے کے مقصد کے ایک حصے کے طور پر اس مہینے کی 28 تاریخ کو بیک وقت 25 بینک عمارتوں کی تعمیر کیلئے سنگ بنیاد کی تقریب منعقد کی جائے گی۔ مرکزی وزیر خزانہ نرملا سیتا رمن اس تقریب میں بطور مہمان خصوصی شرکت کریں گی اور سنگ بنیاد رکھیں گی۔یہ تقریب امراوتی میں سی آر ڈی اے ہیڈ کوارٹر کے قریب منعقد ہوگی۔
امراوتی کے مستقبل میں سرمایہ کاروں کے اعتماد کو بڑھانے میں مدد ملے گی:
قابل ذکر ہے کہ ریزرو بینک آف انڈیا سمیت 25 قومی، نجی اور سرکاری شعبے کے بینکوں کی نئی عمارتوں اور سرکاری رہائش گاہوں کا سنگ بنیاد ایک ہی پلیٹ فارم سے رکھا جائے گا۔ چیف منسٹر چندرا بابو نائیڈو، ڈپٹی چیف منسٹر پون کلیان، مرکزی وزیر پی چندر شیکھر، ریاستی وزراء نارائنا اور نارا لوکیش اور دیگر اس تقریب میں شرکت کریں گے۔دارالحکومت کو مالیاتی مرکز کے طور پر تیار کرنے کے منصوبہ کے حصہ کے طورپر سی آر ڈی اے نے پہلے ہی ان بینکوں کیلئے ضروری زمینیں مختص کر دی ہیں۔ تجزیہ کاروں کا خیال ہے کہ ایک ہی دن میں اتنی زیادہ بینک عمارتوں کا سنگ بنیاد رکھنا امراوتی کی ترقی اور ریاست کی معیشت کو ایک نئی تحریک فراہم کرے گا۔ توقع ہے کہ اس ترقی سے امراوتی کے مستقبل میں سرمایہ کاروں کے اعتماد کو بڑھانے میں مدد ملے گی۔
حکومت سڑکوں کی ترقی کو اولین ترجیح دے رہی ہے:چندرا بابو نائیڈو
چیف منسٹر نارا چندرا بابو نائیڈو نے واضح کیا ہے کہ مخلوط حکومت میں سڑکوں کی ترقی کو اولین ترجیح دی جارہی ہے۔ انہوں نے عہدیداروں کو ہدایت دی ہے کہ دسمبر کے آخر تک ریاست کی تمام سڑکوں کو گڑھے سے پاک کر دیا جائے۔ انہوں نے آر اینڈ بی وزیر بی سی جناردھن ریڈی، محکمہ کے اسپیشل چیف سکریٹری ایم ٹی کرشنا بابو اور دیگر اعلیٰ عہدیداروں کے ساتھ ٹیلی کانفرنس کے ذریعہ جائزہ میٹنگ کی۔اس موقع پر خطاب کرتے ہوئے چیف منسٹر نے وزیر جناردھن ریڈی اور اسپیشل چیف سکریٹری کرشنا بابو کو ہدایت دی کہ وہ ریاست میں سڑکوں کی ترقی اور مرمت کے کاموں کی پیش رفت کا فیلڈ سطح پر خود معائنہ کریں۔
چندرابابو نے تجویز دی کہ جن ٹھیکیداروں نے ابھی تک کام شروع نہیں کیا ان کے خلاف فوری کارروائی کی جائے۔ انہوں نے واضح کیا کہ کام کے معیار پر کوئی سمجھوتہ نہ کیا جائے اور کام کو بہترین معیار کے ساتھ مکمل کیا جائے۔چندرا بابو نے عہدیداروں کو ہدایت دی کہ وہ سڑکوں کی تعمیر میں جدید ٹکنالوجی اور مواد کے استعمال کے اختراعی طریقے اپنائیں ۔ چیف منسٹر نے اس بات کا اعادہ کیا کہ حکومت کا مقصد لوگوں کو محفوظ اور آرام دہ سفر فراہم کرنا ہے۔
