آندھرا پردیش کے ضلع مارکاپورم میں ایک خوفناک سڑک حادثہ پیش آیا۔ آج صبح سویرے ایک نجی بس اور ٹپرلاری کے درمیان تصادم میں 13 مسافر زندہ جل گئے۔ حادثے میں کئی افراد شدید زخمی ہو گئے۔ مہلوکین اور زخمیوں میں خواتین اور بچے بھی شامل ہیں۔
پرائیوٹ ٹریول بس اورٹپرلاری میں تصادم
تفصیلات مطابق تقریباً 35 مسافروں کے ساتھ ایک پرائیویٹ بس حیدرآباد سےضلع پرکاشم کے پامور کے لیے روانہ ہوئی۔ جیسے ہی یہ مارکاپورم ضلع کے رائےورم کے قریب کانوں کے پاس پہنچی، بس مخالف سمت سے آنے والی ایک ٹپر لاری سے ٹکرا گئی۔ حادثہ کی شدت کے باعث بس کا ڈیزل ٹینک پھٹ گیا اور آگ لگ گئی۔ بس اور ٹپر دونوں آگ کی لپیٹ میں آگئے جو تیزی سے پھیل گئی۔
مارکاپورم کے ڈی ایس پی کا بیان
مارکاپورم کے ڈی ایس پی یو ناگراجو نے بتایا کہ حادثہ صبح 6:00 بجے سے 6:30 بجے کے درمیان پیش آیا۔ ہری کرشنا ٹراویلس کی بس تلنگانہ کے جگتیال سے نیلور ضلع کے کالی گیری جارہی تھی جب یہ حادثہ پیش آیا۔ایک تیز رفتار ٹپر لاری جو چمکورتی سے مارکا پورم کی طرف جارہی تھی، کنکریٹ کے بوجھ کے ساتھ مبینہ طور پر بس سے ٹکرا گئی، جس سے بڑے پیمانے پر آگ بھڑک اٹھی۔ دونوں گاڑیاں منٹوں میں آگ کی لپیٹ میں آگئیں اور مکمل طور پر جل کر خاکستر ہوگئیں۔حادثے میں ٹپر ڈرائیور بھی زخمی ہوا اور اسے اسپتال میں داخل کرایا گیا ہے۔
مسافر پھنس گئے، ہلاکتوں میں اضافہ
حادثے کے وقت بس میں 35 سے زیادہ مسافر سوار تھے۔ بس کے عقبی حصے میں بیٹھے افراد فرار ہونے میں ناکام رہے اور جل کر ہلاک ہو گئے۔سامنے والے حصے میں بیٹھے مسافر، جن کی تعداد 10 کے قریب تھی، زخمی ہو کر فرار ہونے میں کامیاب ہو گئے۔ حکام نے ہلاکتوں میں مزید اضافے کا خدشہ ظاہر کیا ہے۔
ریسکیو آپریشن
پولیس اور فائر سروس کے عملے نے جائے وقوعہ پر پہنچ کر امدادی کارروائیاں شروع کر دیں۔ 15 کے قریب مسافر زخمی ہوئے، اور انہیں مارکاپورم کے ایک پرائیویٹ اسپتال میں منتقل کیا گیا، جہاں ان کا علاج چل رہا ہے۔
متاثرین کا تعلق کالی گری علاقہ سے
حکام کو شبہ ہے کہ مرنے والوں میں سے کئی کانیگیری علاقے کے رہائشی ہو سکتے ہیں، تاہم شناخت کا کام ابھی جاری ہے۔
ابتدائی وجہ: تیز رفتاری
ابتدائی نتائج سے پتہ چلتا ہے کہ ٹپر لاری کی تیز رفتاری کے باعث حادثہ پیش آیا۔ اصل وجہ جاننے کے لیے تفصیلی تحقیقات شروع کر دی گئی ہیں۔
ایم ایل اے نے موقع کا دورہ کیا
مارکاپورم کے ایم ایل اے کنڈلا نارائن ریڈی نے جائے حادثہ کا دورہ کیا اور عہدیداروں کے ساتھ صورتحال کا جائزہ لیا۔
تلگو ریاستوں کےوزرائے اعلیٰ کا اظہار افسوس
آندھراپردیش کے سی ایم چندرابابو نے صدمے کا اظہار کیا۔انہوں نے حکام سے بات کی اور زخمیوں کو فراہم کی جا رہی طبی امداد کا جائزہ لیا۔ضلعی پولیس نے وزیر اعلیٰ کو صورتحال پر بریفنگ دی۔ چندرا بابو نائیڈو نے حکام کو ہدایت دی کہ وہ حادثے کی وجوہات کی جامع تحقیقات کریں اور تفصیلی رپورٹ پیش کریں۔تلنگانہ کے سی ایم ریونت ریڈی نے صدمے کا اظہار کرتے ہوئے تفصیلی رپورٹ طلب کی ہے۔
