ہندوستانی فضائیہ کے گروپ کیپٹن شوبھانشو شکلا کو خلا میں لے جانے والا اگزیوم- 4 مشن کئی بار ملتوی ہونے کے بعد بالآخر آج 25 جون کو کامیابی سے روانہ ہو گیا ہے۔ اس مشن کو فلوریڈا سے آج دوپہر 12:01 بجے Space-X کے Falcon-9 راکٹ سے لانچ کیا گیا۔ یہ خلائی جہاز 26 جون کی صبح تقریباً 7:00 بجے بین الاقوامی خلائی اسٹیشن (ISS) سے جڑ جائے گا۔ اس مشن کے ذریعے ہندوستان پہلی بار اپنے ایک شہری کو خلائی اسٹیشن بھیجنے میں کامیاب ہوا ہے۔
ISS تک پہنچنے میں کتنا وقت لگے گا؟
اسپیس ایکس کا ڈریگن کیپسول لانچ کے تقریباً 28-29 گھنٹوں میں خلائی اسٹیشن پر پہنچ جاتا ہے۔ اس کا مطلب ہے کہ شکلا اور ان کی ٹیم 26 جون کی شام تقریباً 4:30 بجے آئی ایس ایس سے جڑے گی۔ یہ خلائی جہاز پہلے زمین کے گرد چند بار چکر لگائے گا اور پھر صحیح وقت پر خلائی اسٹیشن سے جڑ جائے گا۔ اس عمل میں جدید ٹیکنالوجی کا استعمال کیا گیا ہے اور ضرورت پڑنے پر خلاباز اسے خود کنٹرول کر سکتے ہیں۔
اگزیوم- 4 مشن کیا ہے؟
اگزیوم- 4 مشن ایک تجارتی مشن ہے جسے نجی امریکی کمپنی Axiom Space چلاتی ہے۔ اسے NASA اور Space-X کی حمایت بھی حاصل ہے ۔ اس مشن میں 4 ممالک (بھارت، امریکہ، پولینڈ اور ہنگری) کے خلاباز شامل ہیں۔ اس کا مقصد خلائی اسٹیشن پر 14 دن تک رہنا اور مختلف سائنسی، تکنیکی اور حیاتیاتی تجربات کرنا ہے۔ یہ مشن خلاء میں انسانوں کی موجودگی اور سائنس کے مستقبل کے بارے میں بہت سی اہم معلومات فراہم کرے گا۔
یہ مشن ہندوستان کے لیے کیوں خاص ہے؟
یہ اس طرح کا چوتھا مشن ہے جس میں نجی مسافر خلائی اسٹیشن جا رہے ہیں۔ اسےبار بھارت کے گروپ کیپٹن شکلا پرواز کر رہے ہیں، جو خلاء میں جانے والے دوسرے ہندوستانی ہوں گے اور خلائی اسٹیشن تک پہنچنے والے پہلے ہندوستانی بن جائیں گے۔ وہ وہاں تقریباً 2 ہفتے قیام کریں گے اور اس دوران کئی سائنسی تجربات کریں گے۔ خلائی شعبے میں ہندوستان کے لیے یہ ایک تاریخی موقع ہے اور ایک نئی شروعات بھی۔
یہ میری خوشی کا سب سے بڑا دن:شوبھانشو شکلا کے والد
گروپ کیپٹن شوبھانشو شکلا کے والد شمبھو دیال شکلا نے کہا، مجھے بہت فخر محسوس ہے کہ میں شوبھانشو شکلا کا باپ ہوں،یہ میری زندگی کا سب سے خوشی کا دن ہے۔وہیں شوبھانشو شکلا کی بہن شوچی مشرا نے کہا، "یہ پورے ملک کے لیے واقعی ایک قابل فخر لمحہ ہے۔ میں ان کی بہن ہوں، اس لیے میرے لیے یہ ایک جذباتی لمحہ ہے۔ بہت سی خوشی، بہت سی محبت اور گھبراہٹ۔ لیکن جو بھی ہو، اچھا ہو گا، مجھے یقین ہے کہ وہ مکمل طور پر کامیاب ہوں گے۔
