بہار واسی آرگنائزیشن بہار اسمبلی الیکشن سے پہلے الیکشن کمیشن سے اہم مطالبہ کیا۔ تنظیم بہار واسی آرگنائزیشن، دہلی کے ایک وفد نے پیر کوالیکشن کمیشن آف انڈیا کے دفتر، اشوک روڈ، نئی دہلی میں جا کر چیف الیکشن کمشنر کو ایک میمورنڈم پیش کیا۔ وفد نے الیکشن کمیشن آف انڈیا سے بہار سے باہر رہنے والے ووٹروں کے لیے ای ووٹنگ نظام نافذ کرنے کا مطالبہ کیا گیا۔وفد میں قاری اسجد زبیر قاسمی(صدر بہار واسی آرگنائزیشن)، مولانا عبدالسبحان قاسمی ،مولانا محمد جاوید صدیقی قاسمی، مولانا قاف اشرف قاسمی (جنرل سکریٹری) اور مفتی کلیم قاسمی شامل تھے۔
وفد نے کہا کہ 6 اور11 نومبر2025 کو ہونے والے بہاراسمبلی انتخابات میں ریاست کے باہر رہنے والے لاکھوں بہاری اپنے آبائی علاقوں میں جا کر ووٹ دینے سے قاصر ہیں۔ وہ روزگار، تعلیم، کاروبار، علاج معالجہ اور دیگر ضروریات کے سبب مختلف ریاستوں اور بیرونِ ملک رہائش پذیر ہیں۔ ایسی صورت میں ای ووٹنگ کی سہولت ان کے لیے اپنے موجودہ مقام سے ہی اپنے جمہوری حق کو استعمال کرنے کا بہترین ذریعہ ثابت ہو سکتی ہے۔
وفد نے مزید کہا کہ الیکشن کمیشن خود بھی وقتاً فوقتاً ای ووٹنگ نظام کے نفاذ کی سمت میں پیش رفت کا اعلان کرتا رہا ہے۔ چونکہ بہار ریاست میں اس ٹیکنالوجی کا تجرباتی طور پر کامیاب استعمال کیا جا چکا ہے، لہٰذا آئندہ اسمبلی انتخابات میں اسے وسیع پیمانے پر نافذ کیا جانا چاہیے تاکہ تمام اہل ووٹر، چاہے وہ جہاں بھی ہوں، ووٹنگ کے عمل میں حصہ لے سکیں۔
تنظیم کا کہنا ہے کہ ای ووٹنگ نظام کے نفاذ سے ووٹر ٹرن آؤٹ میں اضافہ ہوگا، جمہوری شرکت مضبوط ہوگی اور بہار کے عوام کی حقیقی رائے انتخابی نتائج میں بہتر طور پر جھلک سکے گی۔تنظیم بہار واسی آرگنائزیشن نے تمام سیاسی جماعتوں سے بھی اپیل کی ہے کہ وہ اس عوامی مفاد کے مطالبے کی حمایت کریں اور ملک و بیرونِ ملک مقیم بہاریوں کو جمہوری عمل میں شریک کرنے کے لیے ای ووٹنگ سہولت کے نفاذ میں اپنا مثبت کردار ادا کریں۔
ووٹرلسٹ سے متعلق پھیلائی جا رہی افواہوں پر وضاحت کا مطالبہ
وفد نے اپنے میمورنڈم میں اس بات پر بھی تشویش ظاہر کی کہ حالیہ دنوں میں کچھ افراد یہ غلط افواہ پھیلا رہے ہیں کہ “جو ووٹر ووٹنگ نہیں کریں گے ان کے نام ووٹر لسٹ سے حذف کر دیے جائیں گے۔”یہ افواہ عوام میں بے چینی اور خوف پیدا کر رہی ہے۔ چنانچہ تنظیم نے الیکشن کمیشن آف انڈیا سے مطالبہ کیا کہ وہ اس سلسلے میں فوری طور پر سرکاری وضاحتی بیان جاری کرے اور عوامی آگاہی مہم چلائے تاکہ یہ واضح ہو سکے کہ —صرف ووٹ نہ دینے کی بنیاد پر کسی ووٹر کا نام فہرستِ رائے دہندگان سے نہیں ہٹایا جا سکتا۔ووٹر لسٹ میں کوئی بھی تبدیلی صرف قانونی طریقہ کار کے مطابق ہی ممکن ہے۔
