تلنگانہ میں بلدیاتی انتخابات کےلئےانتخابی مہم پیرکی شام ختم ہوگئی ہے۔ ریاست بھر میں 7 کارپوریشنوں اور 116 میونسپلٹیوں کے لیے11 فروری کو پولنگ ہوگی۔ انتخابی مہم ختم ہوتے ہی ریاست میں مائیکروفون خاموش ہو گئے ہیں۔ پولنگ11فروری کو صبح 7 بجے سے شام 5 بجے تک ہوگی۔
سیاسی پارٹیوں نےلگائی ساری توانائی
انتخابی مہم میں حکمراں جماعت کانگریس، اپوزیشن بی آرایس، بی جےپی اور ایم آئی ایم نے جم کرمہم چلائی۔ تمام پارٹیوں کےاہم لیڈروں نے مہم میں حصہ لیا۔ اور پارٹی امیدواروں کےحق میں ووٹ دینے کی اپیل کی۔ اسی دوران ، سیاسی لیڈروں نے ایک دوسرے پر سنگین الزامات لگائے۔ اور جوابی الزامات کا سلسلہ بھی چل پڑا ۔
11فروری کو پولنگ
تلنگانہ میں تقریباً 2 ماہ سے جاری بلدیاتی انتخابی مہم آج اپنے اختتام کو پہنچ گئی۔ مہم کی مدت ختم ہونے کے ساتھ ہی ریاست بھر کے تمام علاقوں میں انتخابی مائیکروفون بند کر دیے گئے ہیں۔ اس مہینے کی 11 تاریخ کو ریاست کے 7 کارپوریشنوں کے 414 وارڈ ڈویژنوں کے لیے پولنگ ہوگی۔اگر ضروری ہوا تو دوبارہ پولنگ اس ماہ کی 12 تاریخ کو ہوگی۔
12,930 امیدوارانتخابی میدان میں
116 میونسپلٹیوں کے 2582 وارڈوں کے لیے جن میں تمام پارٹیاں اور آزاد امیدوار شامل ہیں، 12,930 امیدوار میدان میں ہیں۔
52لاکھ ووٹرز
ریاستی الیکشن کمیشن نے اس الیکشن کے لیے 8,203 پولنگ اسٹیشن تیار کیے ہیں۔ تمام بلدیات اور کارپوریشنوں میں 52 لاکھ سے زیادہ ووٹر اپنا ووٹ ڈالیں گے۔ ان میں سے 25,62,639 مرد ووٹرز ہیں جبکہ 26,80,014 خواتین ووٹرز ہیں۔ عام طور پر کسی بھی الیکشن میں مرد ووٹرز کی تعداد خواتین سے زیادہ ہوتی ہے۔ لیکن اس الیکشن میں یہ بات قابل ذکر ہے کہ مردوں سے زیادہ خواتین ہیں۔ اس الیکشن میں نہ صرف مرد اور خواتین بلکہ 640 خواجہ سرا بھی اپنا ووٹ کاسٹ کریں گے۔
13فروری کو ووٹوں کی گنتی
ووٹوں کی گنتی اس ماہ کی 13 تاریخ کو ہوگی، میئر اور چیئرپرسن کے انتخابات اس ماہ کی 14 تاریخ کو ہوں گے۔ میونسپل چیئرمین، وائس چیئرمین، کارپوریشن کے میئر اور ڈپٹی میئر کا انتخاب 16 فروری کو ہوگا۔
تین رْخی مقابلہ کا امکان
میونسپل انتخابات میں حکمراں کانگریس، اپوزیشن بھارت راشٹرا سمیتی (BRS) اور بھارتیہ جنتا پارٹی (BJP) کے درمیان سہ رخی مقابلہ دیکھنے کو مل رہا ہے۔ اس مہم میں تینوں بڑے مدمقابلوں کے لیڈروں کی طرف سے بلا روک ٹوک حملے دیکھے گئے۔ حکمراں کانگریس پارٹی نے میونسپل انتخابات میں مینڈیٹ حاصل کرنے کی کوشش کی تاکہ اس کی حکومت کی جانب سے گزشتہ دو سالوں کے دوران نافذ کی گئی فلاحی اسکیموں کو جاری رکھا جاسکے۔اور مجلس بھی اہم سیاسی طاقت کے طور پر بھی دیکھی جا رہی ہے۔
کانگریس کی انتخابی مہم
چیف منسٹر اے ریونت ریڈی جنہوں نے کانگریس مہم کی قیادت کی، بی آر ایس اور بی جے پی پر کانگریس پارٹی کو شکست دینے کے لیے خفیہ ڈیل کرنے کا الزام لگایا۔چیف منسٹر نے بی آر ایس کے صدر اور سابق چیف منسٹر کے چندر شیکھر راؤ (کے سی آر)، ان کے بیٹے کے ٹی راما راؤ (کے ٹی آر) اور دیگر قائدین کو کالیشورم پروجیکٹ اور فارمولا ای کار ریس کیس میں مبینہ بے ضابطگیوں میں بچانے کے لئے بی جے پی پر سخت حملہ بھی کیا۔تلنگانہ پردیش کانگریس کمیٹی (ٹی پی سی سی) کے صدر، تمام ریاستی وزراء، ارکان پارلیمنٹ، ایم ایل ایز اور حکمراں پارٹی کے دیگر قائدین نے پارٹی امیدواروں کے لیے مہم چلائی۔
بی آر ایس کا حکومت پر نشانہ
بی آر ایس مہم کی قیادت کے ٹی آر اور سینئر لیڈر ٹی ہریش راؤ نے کی۔ انہوں نے کانگریس حکومت کو اس کے ادھورے وعدوں اور بدعنوانی کو لے کر نشانہ بنایا۔بی آر ایس قائدین چیف منسٹر ریونت ریڈی پر ان کے کے سی آر کے خلاف مبینہ بدسلوکی کے لئے سخت تنقید کرتے ہوئے ان پر الزام عائد کیا کہ وہ بی آر ایس کے دور حکومت کے دوران مبینہ فون ٹیپنگ کیس سے متعلق کیس میں پوچھ گچھ کے لئے بی آر ایس قائدین کو طلب کرنے کے لئے ایس آئی ٹی کا استعمال کرتے ہوئے اپنی مبینہ بدعنوانی سے عوام کی توجہ ہٹانے کی کوشش کررہے ہیں۔
بی جے پی جنا سینا اتحاد
ریاستی بی جے پی کے صدر رام چندر راؤ اور مرکزی وزراء جی کشن ریڈی اور بندی سنجے کمار نے پارٹی مہم کو آگے بڑھایا۔بی جے پی کے قومی صدر نتن نبین نے بھی محبوب نگر میں ایک جلسہ عام سے خطاب کیا، جب کہ مہاراشٹر کے وزیر اعلیٰ دیویندر فڑنویس نے کمارم بھیم آصف آباد ضلع میں ایک ریلی سے خطاب کیا۔ دونوں لیڈروں نے کانگریس حکومت پر خوشامد کی سیاست کرنے کا الزام لگایا۔
ریاستی بی جے پی لیڈروں نے کانگریس اور بی آر ایس کو ایک ہی سکے کے دو رخ قرار دیتے ہوئے لوگوں سے اپیل کی کہ وہ اپنی پارٹی کو موقع دیں۔بی جے پی نے اپنے منشور میں وعدہ کیا تھا کہ اگر پارٹی بلدیات اور میونسپل کارپوریشنوں میں اقتدار میں آئی تو ہاؤس ٹیکس سمیت کسی بھی ٹیکس میں کوئی اضافہ نہیں کیا جائے گا۔
تلنگانہ میں جنا سینا کی انٹری
جنا سینا پارٹی، جو کہ بی جے پی کی زیرقیادت قومی جمہوری اتحاد (این ڈی اے) کا حصہ ہے، نے بھی بی جے پی کے ساتھ اتحاد کے بغیر 336 امیدوار کھڑے کیے ہیں۔جنا سینا نے یہ بھی اعلان کیا تھا کہ اس کے لیڈر اور آندھرا پردیش کے نائب وزیر اعلی پون کلیان دو دن تک جنا سینا اور بی جے پی امیدواروں کے لیے مہم چلائیں گے۔ تاہم، ان کا دورہ منسوخ کر دیا گیا، اور پارٹی نے منسوخی کی وجوہات کے بارے میں کوئی بیان نہیں دیا۔
