تلنگانہ کے چیف منسٹر ریونت ریڈی ذاتی طور پر جوبلی ہلز اسمبلی حلقہ ضمنی انتخابی مہم میں حصہ لیں گے۔ وہ کانگریس امیدوار کی جیت کیلئے بڑے پیمانے پر مہم چلائیں گے۔ وزیراعلیٰ کے دورے کے شیڈول کو حتمی شکل دے دی گئی ہے۔ اس کے ایک حصے کے طور پر چیف منسٹر ایک بڑی عوامی میٹنگ اور کئی روڈ شوز میں شرکت کریں گے۔کانگریس ذرائع سے ملی معلومات کے مطابق کل جوبلی ہلز حلقہ میں ایک بڑا جلسہ عام منعقد کیا جائے گا۔ روڈ شو کا پہلا مرحلہ 30 اور 31 تاریخ کو ہوگا۔ وزیر اعلی 4 اور 5 نومبر کو روڈ شو کے دوسرے مرحلے میں دوبارہ شرکت کریں گے اور مہم چلائیں گے۔
چیف منسٹر ریونت کی انتخابی مہم دو مرحلوں میں ہوگی:
ٹی پی سی سی کے صدر مہیش کمار گوڑ نے ان کے پروگراموں کے بارے میں میڈیا سے بات کی۔ مہیش کمار گوڑ نے واضح کیا کہ چیف منسٹر ریونت ریڈی کی انتخابی مہم دو مرحلوں میں ہوگی۔ انہوں نے کہا کہ ان کی حکومت کے دور میں جوبلی ہلز میں 70 فیصد فلاحی اسکیمیں عوام کو فراہم کی گئی ہیں۔ انہوں نے بی جے پی پر تنقید کی کہ وہ صرف مذہب کے نام پر ووٹ مانگنے پر توجہ مرکوز کررہی ہے اور حیدرآباد کی ترقی کےلئے کچھ نہیں کررہی ہے۔ ٹی پی سی سی صدر نے خاص طور پر مرکزی وزیر کشن ریڈی پر شہر کی ترقی کیلئے کوئی کام نہ کرنے کا الزام لگایا۔مہیش گوڑ نے یقین ظاہر کیا کہ کانگریس پارٹی یقینی طور پر جوبلی ہلز کے ضمنی انتخاب میں کامیابی حاصل کرے گی۔ انہوں نے کہا کہ اے آئی سی سی لیڈر سب کو دیکھ رہے ہیں اور ہائی کمان کی نظر میں سب برابر ہیں۔
کانگریس جوبلی ہلز ضمنی انتخابی مہم میں سرگرم:
وزیر سیتاکا نے آج صبح جوبلی ہلز ضمنی انتخابی مہم کے حصہ کے طور پر کرشن کانتھ پارک میں مارننگ واکرز سے ملاقات کی اور کانگریس امیدوار نوین یادو کے حق میں ووٹ دینے کی اپیل کی۔ سیتااکا نے ایم ایل اے ناگا راجو کے ہمراہ انتخابی مہم میں حصہ لیا۔ اس موقع پر انہوں نے کہاکہ کانگریس حکومت عوامی مفادات کے تحت آگے بڑھ رہی ہے۔ انہوں نے کہاکہ جوبلی ہلز میں کانگریس کی جیت سے حکومت کو مزید تقویت ملے گی اور حکومت مزید بہتر انداز میں کام کرسکے گی۔ سیتااکا نے عوام سے وعدہ کیاکہ کامیابی کے بعد حلقہ کی ترقی پر توجہ مرکوز کی جائے گی۔
ساتھ ہی بتاتے چلیں کہ جوبلی ہلز حلقہ کے یوسف گوڈا ڈویژن کے تعلق سے کانگریس پارٹی کے قائدین کی ایک اہم میٹنگ وزیر پونم پربھاکر کی قیادت میں منعقد ہوئی۔اس میٹنگ میں چیف منسٹر کے مشیر ویم نریندر ریڈی، ایم ایل اے اے سنکیا، کے نارائن ریڈی، بی لکشما ریڈی، جےویر ریڈی، بی نائک، شیوسینا ریڈی، گریدھر ریڈی، فیروز خان اور دیگر نے شرکت کی۔ اس میٹنگ میں کانگریس امیدوار نوین یادو کی حمایت میں مہم کو تیز کرنے پر بات کی گئی۔ اس کے علاوہ چیف منسٹر ریونت ریڈی کے روڈ شو کے تعلق سے بھی بات چیت کی گئی۔
میٹنگ میں اس بات پر بھی توجہ مرکوز کی گئی کہ حکومت کی طرف سے چلائی جا رہی فلاحی اسکیموں کی وضاحت کیلئے گھر گھر مہم چلائی جائے اور یہ جوش و جذبہ پیدا کیا جائے کہ مقامی کیڈر میں جوبلی ہلز میں کانگریس کی جیت یقینی ہے۔ اس کے علاوہ یہ بھی فیصلہ لیاگیاکہ اس بات کو یقینی بنانے کیلئے کارروائی کی جائے کہ ہر ووٹر پولنگ کے دن ہر 100 ووٹوں کیلئے ایک انچارج مقرر کرکے پولنگ اسٹیشن پہنچے اور اپنا ووٹ ڈالے۔
