دہلی میٹرو ریل کارپوریشن نے آج سے میٹرو کرایہ میں اضافہ کا اعلان کیا ہے۔ دہلی میٹرو میں سفر کرنے والوں کو آج سے بڑھا ہوا کرایہ ادا کرنا ہوگا۔ ڈی ایم آر سی نے کہا کہ یہ اضافہ کم سے کم ہے جو سفر کی دوری کے لحاظ سے صرف 1 سے 4 روپے ہے۔ اسی وقت یہ ایئرپورٹ ایکسپریس لائن کیلئے 5 روپے تک ہے۔اس سلسلہ میں دہلی میٹروریل کارپوریشن نے مسافروں سے تعاون کرنے کی اپیل کی۔ ڈی ایم آر سی نے بتایا ہے کہ دہلی میٹرو کا کرایہ فاصلے کے حساب سے بڑھایا گیا ہے۔
کتنے فاصلے کے لیے کتنا کرایہ؟
ڈی ایم آر سی کے مطابق، 0-2 کلومیٹر کی دوری پر کرایہ پہلے کی طرح 11 روپے ہی رہے گا۔
2-5 کلومیٹر تک 21 روپے لگے گا، جبکہ اتوار اور چھٹیوں پر یہ 11 روپے ہوگا۔
5-12 کلومیٹر پر 32 روپے اور چھٹیوں میں 21 روپے۔
جبکہ 12-21 کلومیٹر پر 43 روپے اور چھٹیوں میں 32 روپے لیا جائے گا۔
21 سے 32 کلومیٹر کا کرایہ 54 روپے اور چھٹیوں پر 43 روپے ہوگا۔
32 کلومیٹر سے زیادہ دوری طے کرنے پر 64 روپے دینا ہوگا۔
ایئرپورٹ ایکسپریس لائن پر اثر!
ایئرپورٹ ایکسپریس لائن (AEL) کا کرایہ بھی تبدیل کر دیا گیا ہے۔ یہاں فاصلے کے لحاظ سے 1 روپے سے 5 روپے تک اضافہ نافذ کیا گیا ہے۔ ڈی ایم آر سی نے کہا ہے کہ یہ اضافہ کم سے کم رکھا گیا ہے، تاکہ مسافر زیادہ بوجھ محسوس نہ کریں۔ اس لائن کو استعمال کرنے والے مسافروں کو اب فاصلے کی بنیاد پر پہلے کی نسبت تھوڑا زیادہ کرایہ ادا کرنا پڑے گا، تاہم اس میں توازن برقرار رکھنے کے لیے چھٹیوں میں بھی چھوٹ جاری رہے گی۔
مسافروں کا سوشل میڈیا پر ردعمل:
کرایوں میں اضافے کے بعد مسافروں نے سوشل میڈیا پر اپنی رائے کا اظہار کیا۔ کچھ لوگوں کا کہنا تھا کہ کرایوں میں اضافہ ٹھیک ہے، لیکن خدمات کو بھی بہتر ہونا چاہیے۔ ایک صارف نے یلو لائن کی خدمات کو بہتر کرنے کی اپیل کی جبکہ دوسرے نے ریڈ لائن پر ٹرینوں کی فریکوئنسی بڑھانے کا مطالبہ کیا۔ گرین لائن کے مسافروں نے کوچز کی تعداد 4 سے بڑھا کر 6 کرنے کی ضرورت کا اظہار کیا، مسافروں کا کہنا ہے کہ سہولیات اور کرایہ متوازن ہونا چاہیے۔
