میانمار میں رات گئے ایک بار پھر زلزلے کے شدید جھٹکوں نے لوگوں کو خوفزدہ کردیا۔ یہاں جمعہ کی دیر رات 23.56 پر 4.2 شدت کا ایک اور زلزلہ آیا۔ اس سے قبل میانمار میں یکے بعد دیگرے چار زلزلے محسوس کیے گئے۔ تھائی لینڈ اس سے سب سے زیادہ متاثر ہوا۔ بنکاک میں صورتحال سب سے زیادہ خراب ہے۔ 7.7 شدت سے لے کر 4.2 شدت کے زلزلے نے ہندوستان، بنگلہ دیش اور چین کو متاثر کیا۔ اس آفت میں اب تک 154 افراد کے ہلاک ہونے کی اطلاع ہے جس میں میانمار کے 144 اور تھائی لینڈ کے 10 افراد شامل ہیں۔
پہلا زلزلہ صبح 11 بج کر 50 منٹ پر آیا۔ اس کی شدت 7.2 ناپی گئی۔ اس کے بعد دوسرا جھٹکا رات 12 بج کر 2 منٹ پر آیا۔ اس کی شدت 7 ریکارڈ کی گئی۔اس کے بعد ایک ایک گھنٹے کے وقفے سے دو اور زلزلے کے جھٹکے محسوس کیے گئے۔ نیشنل سینٹر فار سیسمولوجی کے مطابق پہلے دو زلزلوں کا مرکز زمین سے 10 کلومیٹر کی گہرائی میں تھا جبکہ تیسرا زلزلہ زمین سے 22.5 کلومیٹر کی گہرائی میں آیا۔ میانمار اور تھائی لینڈ میں شدید زلزلے کے بعد ایمرجنسی نافذ کر دی گئی ہے۔
اس کا سب سے زیادہ اثر بنکاک میں دیکھا گیا۔ بنکاک میں اسٹاک ایکسچینج نے تجارت معطل کردی۔ تھائی لینڈ کے دارالحکومت بنکاک میں کئی عمارتیں لرز گئیں۔ کثیر المنزلہ عمارتیں تاش کے پتوں کی طرح منہدم ہوگئیں۔ میانمار میں 144 افراد ہلاک اور 730 زخمی ہوئے۔ ہر طرف تباہی کے مناظر دکھائی دے رہے ہیں۔ لوگ ملبے میں اپنے پیاروں کو تلاش کر رہے ہیں۔ زلزلے کے باعث میانمار میں ایمرجنسی نافذ کر دی گئی ہے۔
