منصف ٹی وی کے خصوصی پروگرام "ہیلتھ اور ہم" میں بچوں کی صحت سے متعلق ایک اہم موضوع "بچوں میں بار بار نزلہ اور کھانسی (Recurrent Cold and Cough in Children)" پر گفتگو کی گئی۔ اس پروگرام میں ڈاکٹر سندورا، ماہر اطفال، رینبو چلڈرنز ہاسپٹل، حمایت نگر برانچ، حیدرآباد نے بچوں میں بار بار ہونے والی کھانسی اور نزلہ کی وجوہات، احتیاطی تدابیر اور علاج کے حوالے سے تفصیلی معلومات فراہم کیں۔
ڈاکٹر سندورا نے بتایا کہ بچوں میں نزلہ اور کھانسی ایک عام مسئلہ ہے، خاص طور پر چھوٹے بچوں میں کیونکہ ان کا مدافعتی نظام ابھی مکمل طور پر مضبوط نہیں ہوتا۔ اسکول جانے والے بچے بھی ایک دوسرے کے قریب رہنے کی وجہ سے وائرل انفیکشن کا زیادہ شکار ہو سکتے ہیں۔
انہوں نے کہا کہ عام طور پر بچوں کو سال میں کئی مرتبہ نزلہ، زکام یا ہلکی کھانسی ہو سکتی ہے، جو اکثر وائرس کی وجہ سے ہوتی ہے اور مناسب دیکھ بھال سے خود بہتر ہو جاتی ہے۔ تاہم اگر کھانسی مسلسل جاری رہے، بار بار واپس آئے یا اس کے ساتھ سانس لینے میں دشواری، تیز بخار، وزن میں کمی یا بچے کی سرگرمیوں میں واضح کمی نظر آئے تو والدین کو ڈاکٹر سے رجوع کرنا چاہیے۔
پروگرام میں بات کرتے ہوئے ڈاکٹر سندورا نے بتایا کہ بچوں میں بار بار کھانسی کی وجوہات میں وائرل انفیکشن کے علاوہ الرجی، دمہ (Asthma)، دھول، آلودگی، موسم کی تبدیلی اور بعض اوقات ناک یا گلے کے مسائل بھی شامل ہو سکتے ہیں۔
انہوں نے والدین کو مشورہ دیا کہ بچوں کی صحت کے لیے گھر کا ماحول صاف رکھیں، دھوئیں اور آلودگی سے بچوں کو محفوظ رکھیں، ہاتھوں کی صفائی کا خیال رکھیں اور بچوں کو متوازن غذا فراہم کریں۔ انہوں نے یہ بھی کہا کہ بچوں کو خود سے اینٹی بایوٹک دینا مناسب نہیں، کیونکہ ہر کھانسی میں اینٹی بایوٹک کی ضرورت نہیں ہوتی۔
ماہر اطفال نے بتایا کہ بچوں کو مناسب نیند، پانی کی مناسب مقدار اور صحت مند خوراک دینا ان کے مدافعتی نظام کو بہتر بنانے میں مددگار ثابت ہوتا ہے۔
ہیلتھ اور ہم پروگرام کے ذریعے منصف ٹی وی عوام کو صحت سے متعلق اہم معلومات فراہم کر رہا ہے تاکہ والدین بچوں کی عام بیماریوں کو بہتر انداز میں سمجھ سکیں اور بروقت مناسب اقدامات کر سکیں۔
قارئین اس موضوع پر ڈاکٹرسندھورا کی مکمل بات چیت آپ یہاں دیکھ سکتےہیں۔ اس کےعلاوہ منصف ٹی وی کے چینل ہیلتھ اور ہم میں صحت سے متعلق کئی ویڈیوز سے بھی استفادہ کیا جا سکتا ہے۔
