اتر پردیش کے ضلع کوشامبی میں پٹاخہ بنانے والی فیکٹری میں پیر کے روز ایک زبردست دھماکہ ہوا۔ اس دھماکہ، میں کم از کم پانچ افراد ہلاک اور متعدد زخمی ہو گئے۔ اطلاعات کے مطابق دھماکا اتنا زوردار تھا کہ پوری فیکٹری ملبے کا ڈھیر بن گئی۔ کوشامبی کے ضلع مجسٹریٹ امیت کمار پال نے پانچ لوگوں کی موت کی تصدیق کی ہے۔ کئی دیگر کے زخمی ہونے کی اطلاع ہے، جن میں سے کچھ کی حالت تشویشناک بتائی جاتی ہے۔ ریسکیو ٹیمیں اب بھی ملبے سے لاشیں نکال رہی ہیں جب کہ متعدد افراد کے پھنسے یا لاپتہ ہونے کا خدشہ ہے۔
ریسکیو آپریشن
ضلع مجسٹریٹ امیت پال نے بتایا کہ دھماکہ پپری تھانہ علاقہ کے تحت منوری گاؤں میں پٹاخہ بنانے والی فیکٹری میں ہوا جس کے بعد پانچ زخمی لوگ جنہیں پریاگ راج کے ایس آر این اسپتال ریفر کیا گیا تھا علاج کے دوران فوت ہو گئے۔امیت کمار پال کے مطابق، تقریباً 8 سے 10 JCB مشینیں جائے وقوعہ پر تعینات کی گئی ہیں، اور بچاؤ آپریشن تقریباً چار گھنٹے سے مسلسل جاری ہے۔ آئی جی اور ڈی آئی جی جیسے سینئر حکام سمیت پولیس کی بڑی نفری موقع پر موجود ہے۔
متعدد افراد لاپتہ!
دریں اثنا، اہل خانہ بے چینی سے اپنے پیاروں کے بارے میں معلومات کا انتظار کر رہے ہیں، متعدد افراد کے لاپتہ ہونے کی اطلاع ہے۔ انسداد دہشت گردی اسکواڈ (اے ٹی ایس) کی ٹیمیں بھی جائے وقوعہ پر پہنچ گئی ہیں اور دھماکے کے ارد گرد کے حالات کی تحقیقات کر رہی ہیں۔ انتظامیہ کا کہنا ہے کہ ریسکیو آپریشن مکمل ہونے کے بعد ہی ہلاکتوں اور زخمیوں کی حتمی تعداد کی تصدیق کی جائے گی۔
50 میٹر کے دائرے میں موجود مکانات کو نقصان
دھماکے کی شدت اتنی تھی کہ پٹاخوں کی فیکٹری مکمل طور پر منہدم ہو گئی۔ اس کا اثر آس پاس کے علاقے میں بھی محسوس کیا گیا، رپورٹس کے مطابق فیکٹری کے 50 میٹر کے دائرے میں واقع پانچ سے سات مکانات کو نقصان پہنچا ہے۔اطلاعات کے مطابق دھماکے کی آواز تقریباً دو کلومیٹر دور تک سنی گئی۔ دھماکے کے فوراً بعد دھوئیں کے بڑے بادل آسمان پر اٹھتے دیکھے گئے جس نے آس پاس کے علاقے کو اپنی لپیٹ میں لے لیا۔ فیکٹری کے اندر پٹاخوں کے درمیان لگنے والی آگ نے چھوٹے اور بڑے دھماکوں کا سلسلہ بھی شروع کر دیا جس سے ریسکیو آپریشن مزید مشکل ہو گیا اور علاقے کو کچھ دیر کے لیے خطرناک بنا دیا۔
25 کے قریب کارکن فیکٹری میں تھے
ابتدائی معلومات کے مطابق پٹاخہ بنانے والی فیکٹری میں 25 کے قریب مزدور کام کر رہے تھے جب دھماکہ ہوا۔ یہ فیکٹری کوشامبی کے پورمفتی پولیس اسٹیشن حدود کے تحت منوری علاقے میں واقع ہے۔ پولیس، فائر بریگیڈ کے عملے اور انتظامی ٹیموں کو جائے وقوعہ پر تعینات کیا گیا ہے۔ امدادی اور بچاؤ کی کاروائیاں جاری ہیں، ٹیمیں آگ کو مکمل طور پر بجھانے اور منہدم ڈھانچے کو صاف کرنے کے لیے کام کر رہی ہیں تاکہ ان لوگوں کو تلاش کیا جا سکے جو اب بھی پھنسے ہوئے ہیں۔ضلع انتظامیہ نے بتایا کہ منوری ایئر فورس اسٹیشن اس مقام سے تقریباً دو کلومیٹر کے فاصلے پر واقع ہے، اور کوشامبی اور پریاگ راج سے ایئر فورس، پولیس اور فائر بریگیڈ کی ٹیمیں ریسکیو آپریشن میں شامل تھیں۔
