اسرائیلی ذرائع ابلاغ کے مطابق اسرائیلی بحریہ کے ایلیٹ کمانڈو یونٹ نے غزہ جانے والے “گلوبل فلوٹیلا” کو روکنے کے لیے بڑا آپریشن شروع کر دیا ہے۔ اطلاعات کے مطابق کارروائی قبرص کے ساحل سے سیکڑوں کلومیٹر دور بین الاقوامی پانیوں میں کی گئی۔ رپورٹس میں بتایا گیا ہے کہ اسرائیلی افواج نے فلوٹیلا کے جہازوں پر چڑھائی کرتے ہوئے ان کا کنٹرول سنبھالنا شروع کر دیا، جبکہ جہازوں کو اپنے انجن بند کرنے کے احکامات بھی دیے گئے۔
نیتن یاہو کی ہنگامی سیکیورٹی میٹنگ
اسرائیلی میڈیا کے مطابق وزیر اعظم نیتن یاہو نے فلوٹیلا کی صورتحال پر سینئر سیکیورٹی حکام کے ساتھ ہنگامی اجلاس طلب کیا، جس میں آپریشن کی پیش رفت اور ممکنہ نتائج کا جائزہ لیا گیا۔ رپورٹس کے مطابق اسرائیلی بحریہ کے خصوصی یونٹ “شیطیت 13” کو جہازوں پر قبضے کے لیے تعینات کیا گیا ہے۔
فلوٹیلا منتظمین کا شدید ردعمل
فلوٹیلا کے منتظمین نے ایک بیان میں کہا کہ اسرائیلی فوج نے “واضح طور پر نظر آنے والے انسانی مشن” کو نشانہ بنایا ہے۔ انہوں نے مطالبہ کیا کہ بین الاقوامی برادری فوری مداخلت کرے اور غزہ کی ناکہ بندی برقرار رکھنے کے لیے کی جانے والی بحری قزاقی کو روکے۔ منتظمین کا کہنا ہے کہ ان کا مشن مکمل طور پر انسانی، قانونی اور پرامن نوعیت کا ہے، جس کا مقصد غزہ تک امداد پہنچانا ہے۔
100 سے زائد کارکنوں کی گرفتاری کی اطلاعات
اسرائیلی میڈیا کے مطابق فلوٹیلا میں سوار تقریباً 100 افراد کو حراست میں لے لیا گیا ہے۔ رپورٹس میں کہا گیا ہے کہ کارکنوں کو ایک ایسے بحری جہاز میں منتقل کیا گیا جو عارضی “تیرتی جیل” کے طور پر استعمال کیا جا رہا ہے، جس کے بعد انہیں اشدود بندرگاہ منتقل کیے جانے کا امکان ہے۔ البتہ فلوٹیلا ذرائع کا کہنا ہے کہ ایک جہاز کو روکنے کا مطلب یہ نہیں کہ غزہ کی جانب پورا سفر ختم ہو گیا ہے۔
