منصف ٹی وی کے مقبول پروگرام "ہیلتھ اور ہم" میں آج پھیپھڑوں کے کینسر (Lung Cancer) جیسے اہم موضوع پر خصوصی گفتگو کی گئی۔ پروگرام میں اپولو ہاسپٹلز جوبلی ہلز حیدرآباد کے کنسلٹنٹ میڈیکل آنکولوجسٹ ڈاکٹر شروان کمار دباسی نے پھیپھڑوں کے کینسر کی وجوہات، علامات، تشخیص اور جدید علاج کے طریقوں پر تفصیلی روشنی ڈالی۔
ڈاکٹر شروان کمار نے بتایا کہ پھیپھڑوں کا کینسر ایک سنگین بیماری ہے جس میں پھیپھڑوں کے خلیات غیر معمولی طور پر بڑھنے لگتے ہیں۔ یہ صرف سگریٹ نوشی کرنے والوں تک محدود نہیں ہے بلکہ فضائی آلودگی، کام کی جگہ پر نقصان دہ مادوں سے متاثر ہونا اور دیگر عوامل بھی اس خطرے کو بڑھا سکتے ہیں۔
انہوں نے کہا کہ بھارت میں پھیپھڑوں کے کینسر کے معاملات میں اضافہ دیکھا جا رہا ہے اور اب یہ بیماری صرف بزرگ افراد تک محدود نہیں رہی۔ تمباکو نوشی اس کا ایک بڑا سبب ہے، لیکن بڑھتی ہوئی آلودگی بھی ایک اہم خطرہ بن چکی ہے۔پروگرام میں ابتدائی علامات پر بات کرتے ہوئے ڈاکٹر نے بتایا کہ مسلسل کھانسی، سینے میں درد، سانس لینے میں دشواری، کھانسی کے ساتھ خون آنا، وزن میں کمی اور غیر معمولی تھکن جیسی علامات کو نظر انداز نہیں کرنا چاہیے۔ بروقت تشخیص سے علاج کے امکانات بہتر ہو سکتے ہیں۔
انہوں نے بتایا کہ پھیپھڑوں کے کینسر کی تشخیص کے لیے جدید طریقوں جیسے سی ٹی اسکین، امیجنگ ٹیسٹ اور بایوپسی کا استعمال کیا جاتا ہے۔ علاج کا انتخاب مریض کی حالت اور کینسر کے مرحلے کے مطابق کیا جاتا ہے، جس میں سرجری، کیموتھراپی، ریڈی ایشن تھراپی اور جدید ٹارگٹڈ تھراپی شامل ہیں۔
ڈاکٹرشروان کمار نے کہا کہ وقت پرعلاج شروع کرنے سے مریض کی زندگی کے معیار اور طویل مدتی نتائج میں نمایاں بہتری آ سکتی ہے۔ انہوں نےعوام کو مشورہ دیا کہ سگریٹ نوشی سے پرہیز کریں، آلودگی سے بچاؤ کے اقدامات اختیار کریں اور کسی بھی مشتبہ علامت کی صورت میں فوری طبی مشورہ حاصل کریں۔پروگرام کے اختتام پر انہوں نے زور دیا کہ کینسر کے خلاف سب سے بڑا ہتھیار آگاہی، احتیاط اور بروقت علاج ہے۔
قارئین آپ ڈاکٹرشروان کمار کی مکمل بات چیت اس ویڈیو میں دیکھ سکتےہیں۔
