آئی پی ایل کے 64 ویں مقابلے میں آج راجستھان رائلز اور لکھنؤ سپر جائنٹس کے درمیان زبردست مقابلہ کھیلا جائے گا۔ یہ میچ جے پور کے سوائی مان سنگھ اسٹیڈیم میں ہوگا جہاں شائقین کوایک سنسنی خیز مقابلہ دیکھنے کی امید ہے۔
راجستھان رائلز کیلئے یہ میچ بے حد اہم مانا جا رہا ہے کیونکہ پلے آف میں پہنچنے کی امیدیں برقرار رکھنے کیلئے ٹیم کو ہر حال میں کامیابی حاصل کرنا ہوگی۔ خاص بات یہ ہے کہ راجستھان نے اس سیزن میں اپنے گھریلو میدان سوائی مان سنگھ اسٹیڈیم میں ابھی تک ایک بھی میچ نہیں جیتا ہے، جس کی وجہ سے آج کا مقابلہ ٹیم کیلئے کرو یا مرو کی حیثیت اختیار کر چکا ہے۔
راجستھان کی کامیابی کا زیادہ تر انحصار سلامی بلے باز یشسوی جیسوال اور ویبھو سوریاونشی کی کارکردگی پر ہوگا۔ دونوں کھلاڑی حالیہ مقابلوں میں اچھی فارم میں نظر آئے ہیں اور ٹیم کو ان سے بڑی اننگز کی امید رہے گی۔ تاہم راجستھان کو اپنی بولنگ میں بھی بہتری لانے کی ضرورت ہوگی کیونکہ گزشتہ میچوں میں بولرز متاثر کن کارکردگی پیش نہیں کر سکے۔
دوسری جانب لکھنؤ سپر جائنٹس بھی اپنی خامیوں پر قابو پاتے ہوئے ایک اور کامیابی حاصل کرنے کے ارادے سے میدان میں اترے گی۔ ٹیم کے کھلاڑی متوازن کارکردگی دکھا رہے ہیں اور وہ راجستھان کیلئے سخت چیلنج ثابت ہو سکتے ہیں۔ اس مقابلے کے بعد راجستھان کا اگلا میچ دہلی کیپیٹلس کے خلاف ہوگا، اس لئے آج کی جیت ٹیم کیلئے نہایت اہم سمجھی جا رہی ہے۔ میچ شام ساڑھے سات بجے شروع ہوگا۔
