ایران کی وزارتِ خارجہ نے ہفتے کے روز اعلان کیا ہے کہ وزیر خارجہ عباس عراقچی کے دورۂ اسلام آباد کے دوران امریکا کے ساتھ کسی بھی قسم کی براہِ راست بات چیت طے نہیں ہے۔
وزارت کے ترجمان اسماعیل باغائی نے بتایا کہ عباس عراقچی کی قیادت میں ایک اعلیٰ سطحی وفد اسلام آباد پہنچا ہے، جہاں وہ پاکستانی قیادت سے اہم ملاقاتیں کریں گے۔ ان ملاقاتوں کا مقصد خطے میں امن کو فروغ دینا اور کشیدگی میں کمی لانا ہے۔
انہوں نے اپنے بیان میں کہا کہ ایران اور امریکا کے درمیان کسی آمنے سامنے ملاقات کا کوئی منصوبہ نہیں ہے اور ایران اپنے مؤقف سے پاکستان کے ذریعے آگاہ کرے گا۔ ان کے مطابق یہ دورہ علاقائی استحکام اور امن کی بحالی کی کوششوں کا حصہ ہے۔
واضح رہے کہ عباس عراقچی جمعہ کو اسلام آباد پہنچے تھے، جس کے بعد ایران اور امریکا کے درمیان ممکنہ مذاکرات سے متعلق قیاس آرائیاں شروع ہو گئی تھیں، تاہم ایران نے ان خبروں کی تردید کر دی ہے۔
امریکہ کی سفارتی سرگرمیاں
دوسری جانب، وائٹ ہاؤس نے اعلان کیا ہے کہ امریکی صدر ڈونلڈ ٹرمپ اپنے نمائندوں کو پاکستان بھیج رہے ہیں تاکہ سفارتی کوششوں کو آگے بڑھایا جا سکے۔
وائٹ ہاؤس کی ترجمان کیرولین لیویٹ کے مطابق، امریکی نمائندے ایرانی وزیر خارجہ کے ساتھ بات چیت کریں گے۔ انہوں نے امید ظاہر کی کہ یہ مذاکرات مثبت ثابت ہوں گے اور کسی ممکنہ معاہدے کی راہ ہموار کریں گے۔
یہ پیش رفت ایک ایسے وقت میں سامنے آئی ہے جب مشرق وسطیٰ میں کشیدگی بڑھ رہی ہے اور عالمی برادری امن کے قیام کے لیے کوشاں ہے۔
