اسرائیل-امریکہ کے ایران پر حملہ کرنے کے بعد ایران مسلسل جوابی کاروائی کرتے ہوئے مشرق وسطیٰ میں موجود امریکی فوجی اڈوں پر میزائلوں کی بوچھاڑ کر رہا ہے ۔ تازہ ترین حملہ میں ایرانی فوج IRGC نے سعودی عرب کے پرنس سلطان ایئر بیس کو نشانہ بنایا ۔ اس حملے میں کئی امریکی فوجی زخمی ہو گئے ہیں۔ میڈیا رپورٹس کے مطابق اس حملے میں میزائلوں اور ڈرونز کا استعمال کیا گیا۔ اس حملے میں دو امریکی فوجی شدید زخمی ہو گئے، جبکہ آٹھ دیگر فوجیوں کو بھی سنگین چوٹیں آئیں۔
اسرائیل پر میزائلوں کی بوچھاڑ
اسی دوران، اسرائیل کے تل ابیب میں ایک میزائل حملہ ہوا، جس میں 52 سالہ ایک شخص کی موت ہو گئی اور دو دیگر زخمی ہو گئے۔ رپورٹس کے مطابق، میزائل میں ایک کلسٹر وار ہیڈ لگا تھا، جو ہوا میں ہی پھٹ کر چھوٹے چھوٹے سب میونیشن بکھیر دیتا ہے، جس سے ایک بڑے علاقے میں نقصان ہوتا ہے۔ اسرائیل ڈیفنس فورسز (IDF) نے بتایا کہ انہوں نے ایران سے داغی گئی کئی میزائلوں کو تباہ کر دیا۔
اسرائیل کے حملے کے بعد جوابی کاروائی شروع
قابل ذکر ہے کہ اسرائیل اور امریکہ نے 28 فروری کو ایران پر تہران سمیت کئی شہروں پر شدید بمباری کی تھی۔ اس میں ایران کے سپریم لیڈر آیت اللہ علی خامنہ ای شہید ہو گئے۔ سپریم لیڈر کی شہادت کے بعد ایران نے جوابی کاروائی کرتے ہوئے اسرائیل اور مشرق وسطیٰ میں موجود امریکی فوجی ٹھکانوں کو نشانہ بنایا۔ ساتھ ہی ایران نے امریکہ کے کئی فوجی طیاروں کو مار گرایا ہے۔ اب تک امریکہ کے 16 فوجی طیارے اور ڈرون تباہ ہو چکے ہیں۔ جبکہ اسرائیل میں بھی بھاری تباہی ہوئی ہے۔
