وزیر اعظم نریندر مودی کی صدارت میں آج کابینہ کی میٹنگ ہونے جا رہی ہے۔ آپ کو بتاتے چلیں کہ آپریشن سندور کے بعد مودی حکومت کی یہ پہلی میٹنگ ہے۔ معلومات کے مطابق، یہ میٹنگ تقریباً شام 5 بجے سشما سوراج بھون میں شروع ہوگی۔ پی ایم مودی کی صدارت میں ہونے والی اس میٹنگ میں کئی بڑے فیصلے لیے جا سکتے ہیں۔ اس کے ساتھ ساتھ تمام وزراء کو آپریشن سندور کے بارے میں بھی تفصیلی معلومات فراہم کی جائیں گی۔
آپ کو بتاتے چلیں کہ یہ میٹنگ اس لیے بھی اہم سمجھی جا رہی ہے ،کیونکہ مرکزی حکومت کو 11 سال مکمل ہو رہے ہیں۔ مودی 3.0 نے بھی ایک سال مکمل کر لیا ہے۔ اس میٹنگ میں مودی حکومت کے وزراء کے کام اور کامیابیوں پر بھی تبادلہ خیال کیا جائے گا۔ اس کے ساتھ تمام وزراء اپنے محکموں کے کام سے متعلق پریزنٹیشن بھی دیں گے۔ ذرائع کے مطابق جل شکتی وزارت اور کچھ دیگر وزارتیں بھی میٹنگ میں اپنے کام کے بارے میں پریزنٹیشن دینے والے ہیں۔ پی ایم مودی نے اپنی کابینہ کے تمام وزراء کو ہدایت کی ہے کہ وہ عوام کے درمیان جائیں اور انہیں گزشتہ 11 سال کی تمام کامیابیوں کے بارے میں بتائیں۔
وزیر اعظم مودی کی ہدایات کے بعد ہی تمام وزارتیں اپنی کامیابیوں کو اطلاعات و نشریات کی وزارت کو بھیج رہے ہیں۔ ان کامیابیوں کو کتابچے کی شکل دی جائے گی۔ ساتھ ہی ان سے یہ بھی کہا گیا ہے کہ وہ سوشل میڈیا کی مدد سے ان کامیابیوں کی تشہیر کریں۔ ذرائع نے یہ بھی انکشاف کیا ہے کہ اس میٹنگ میں یو پی اے اور این ڈی اے حکومتوں کے دور کا بھی موازنہ کیا جائے گا۔ ساتھ ہی انہیں مرکزی حکومت کی اسکیموں سے فائدہ اٹھانے والوں سے رابطہ کرنے کو بھی کہا گیا ہے۔
مودی حکومت کی کابینہ کی اس میٹنگ میں جمعرات 5 جون کو یوم ماحولیات، 9 جون کو مودی 3.0 کے ایک سال مکمل ہونے، 21 جون کو عالمی یوم یوگا اور 25 جون کو ایمرجنسی کے 50 سال مکمل ہونے پر بھی بات چیت ہوگی۔
