جموں و کشمیر کے وزیر اعلیٰ عمرعبداللہ نے پیر کے روز کہا کہ عام آدمی پارٹی کے ایم ایل اے مہراج ملک کو پبلک سیفٹی ایکٹ (PSA) کے تحت کبھی بھی نظر بند نہیں کیا جانا چاہئے تھا۔ ہائی کورٹ کی جانب سے ان کی نظر بندی کو منسوخ کرنے کے بعدعمر عبداللہ نے عدالت کے فیصلے پر رد عمل ظاہر کیا۔ انھوں نے اس اقدام کو قانون کا "بہت زیادہ غلط استعمال" قرار دیا۔
نظر بندی اس قانون کا سراسرغلط استعمال
جموں و کشمیر کے وزیراعلیٰ عمر عبد اللہ نے کہا "اسے کبھی بھی PSA کے تحت حراست میں نہیں لیا جانا چاہیے تھا، درحقیقت انھیں کبھی بھی حراست میں نہیں لیا جانا چاہیے تھا۔ ان کی نظر بندی اس قانون کا سراسر غلط استعمال اور مکمل طور پر غیر منصفانہ تھی۔"
ہائی کورٹ کے فیصلے سے سبق لیں حکام
سی ایم عمر عبد اللہ نے کہا کہ انہیں امید ہے کہ حراست کے ذمہ دار حکام اس فیصلے کا نوٹس لیں گے اور ایسے قوانین کے استعمال پر غور کریں گے۔ "مجھے امید ہے کہ اس نظر بندی کے ذمہ دار لوگ معزز ہائی کورٹ کے فیصلے سے ایک قیمتی سبق سیکھیں گے اور جموں و کشمیر میں ان قوانین کا جس طرح غلط استعمال کیا جا رہا ہے اس پر غور کریں گے۔"
ہائی کورٹ نے نظر بندی کے حکم کوکیا منسوخ
اس سے پہلے دن میں، جموں و کشمیر اور لداخ کی ہائی کورٹ نے عام آدمی پارٹی کے ایم ایل اے مہراج ملک کی نظر بندی کے حکم کو منسوخ کر دیا، جن پر 2025 میں PSA کے تحت مقدمہ درج کیا گیا تھا۔حکام نے بتایا کہ جسٹس محمد یوسف وانی نے کھلی عدالت میں اعلان کیا کہ ملک کے خلاف حفاظتی نظر بندی کا حکم کالعدم ہے۔ملک کو گزشتہ سال پی ایس اے کے تحت حراست میں لیا گیا تھا۔
ستمبر8 کولیا گیا تھا حراست میں
ڈوڈہ حلقے سے عام آدمی پارٹی کے ایم ایل اے مہراج ملک کو 8 ستمبر 2025 کو امن عامہ میں خلل ڈالنے کے الزامات کے تحت حراست میں لیا گیا تھا اور کٹھوعہ ڈسٹرکٹ جیل منتقل کیا گیا تھا۔انہوں نے اپنی نظر بندی کو چیلنج کیا تھا، جسے اب عدالت نے قبول کرتے ہوئے ان کی رہائی کا حکم دیا ہے۔
وہ جموں و کشمیر میں پی ایس اے کے تحت حراست میں لیے جانے والے پہلے ایم ایل اے تھے۔
