ویتنام میں ہندوستانی سیاحوں کی کشتی الٹ گئی
حادثے میں 15 افراد کی موت اور21 زخمی ہوگئے
وزیر اعظم مودی نے واقعہ سے شدید صدمہ کا اظہا ر کیا
ہندوستانی سفارت خانہ مدد کے لیے آگے بڑھ رہا ہے
متاثرین کے لیے کنٹرول روم قائم،ریونت ریڈی اور نائیڈو کا اظہاردکھ
ویتنام میں ہندوستانی سیاحوں کو لے جانے والی کشتی الٹ گئی۔ اس حادثے میں 15 ہندوستانی ہلاک اور21افراد کو ریسکیو کیا گیا۔ وزیراعظم نریندر مودی نے اس واقعہ پر گہرے صدمے کا اظہار کیا ہے۔ انہوں نے متاثرین کی ہر ممکن مدد کی یقین دہانی کرائی۔
یہ حادثہ ہفتہ کو ویتنام کے فو کووک جزیرے کے قریب پیش آیا۔ مقامی میڈیا رپورٹس کے مطابق اسپیڈ بوٹ جس میں 32 بھارتی سیاح، ایک فلائٹ اٹینڈنٹ اور عملے کے چار ارکان سوار تھے اچانک فنی خرابی کے باعث ڈوب گئی۔ دیگر قریبی سیاحوں کی کشتیوں نے فوری طور پر امدادی کاروائیاں شروع کر دیں۔ 21 زخمیوں کو بچا کر قریبی اسپتالوں میں علاج کے لیے لے جایا گیا۔
وزیر اعظم مودی نے 'X' پلیٹ فارم پر افسوسناک واقعہ پر ردعمل ظاہر کیا۔ مودی نے کہا، "ویتنام کے Phu Quoc کے قریب ہندوستانی شہریوں کی کشتی کے حادثے کی المناک خبر سن کر بہت دکھ ہوا۔ سوگوار خاندانوں کے ساتھ میری گہری تعزیت۔ میں زخمیوں کی جلد صحت یابی کے لیے دعا کرتا ہوں،" ۔
انہوں نے کہا کہ ہندوستانی سفارت خانہ اور قونصلیٹ کے اہلکار ویتنام کے حکام کے ساتھ مل کر متاثرہ خاندانوں کو مدد فراہم کر رہے ہیں۔ ہندوستانی سفارت خانے نے اعلان کیا کہ معلومات کے لیے ہو چی منہ سٹی اور ہنوئی میں خصوصی کنٹرول روم قائم کیے گئے ہیں۔ حکام نے بتایا کہ مقامی حکام اپنی تلاشی کارروائیاں جاری رکھے ہوئے ہیں اور واقعے کی مکمل تفصیلات کا ابھی پتہ نہیں چل سکا ہے۔
تلنگانہ سی ایم کا اظہار،رنج
ویتنام میں پیش آئے کشتی حادثے پر تلنگانہ کے وزیراعلیٰ ریونت ریڈی نے گہرے رنج و غم کا اظہار کیا ہے۔ وزیراعلیٰ نے کہا کہ ویتنام میں پیش آئے حادثے میں تلنگانہ اور آندھرا پردیش سے تعلق رکھنے والے بعض سیاحوں کی ہلاکت کی اطلاع انتہائی افسوسناک ہے۔وزیراعلیٰ کے دفتر کے مطابق، واقعے کی اطلاع ملتے ہی ریونت ریڈی نے اعلیٰ حکام کو ہدایت دی کہ وہ فوری طور پر متحرک ہوجائیں۔ انہوں نے چیف سیکریٹری کو ہدایت دی کہ وہ وزارتِ خارجہ اور ویتنام میں موجود ہندوستانی سفارت خانے کے حکام سے مسلسل رابطہ رکھیں، حادثے کی مکمل تفصیلات حاصل کریں اور متاثرہ خاندانوں کو مدد پہنچانے کے لیے تمام ضروری اقدامات کو تیز کریں۔
اےپی سی ایم کارد عمل
آندھراپردیش کے چیف منسٹر چندرابابو نائیڈو نے ویتنام میں سیاحوں کی کشتی کے حادثے پر گہرے دکھ کا اظہار کیا۔ انہوں نے اپنے دکھ کا اظہار کیا کہ ریاست کے باشندوں کی چھٹی کے دوران جانوں کا ضیاع انتہائی تکلیف دہ ہے۔ انہوں نے مرنے والوں کے اہل خانہ سے دلی تعزیت کا اظہار کیا۔ بتایا جارہا ہے کہ آندھرا پردیش کے کل 33 سیاح ایک موبائل کمپنی کی جانب سے ویتنام گئے تھے۔ معلوم ہوا ہے کہ اس ناخوشگوار واقعہ میں تین افراد کی موت ہو گئی۔ باقی 16 افراد کو ریسکیو ٹیموں نے بحفاظت نکال لیا۔
سی ایم چندرا بابو نے فوری طور پر عہدیداروں کے ساتھ اس واقعہ کا جائزہ لیا۔ انہوں نے حکم دیا کہ حادثے میں بچ جانے والوں کو بحفاظت ریاست پہنچانے کے لیے تمام ضروری انتظامات کیے جائیں۔ انہوں نے واضح کیا کہ وہ متوفی کے لواحقین سے بات کریں اور انہیں ضروری مدد فراہم کریں۔ چیف منسٹر نے دہلی میں اے پی بھون کے عہدیداروں کو ویتنام میں ہندوستانی سفارتخانے کے عہدیداروں اور مقامی حکام کے ساتھ تال میل قائم کرنے کی ہدایت دی۔ انہوں نے متاثرین کو یقین دلایا کہ حکومت ان کی ہر طرح سے مدد کرے گی۔
