بھارت کے وزیراعظم نریندر مودی 25 فروری سے اسرائیل کے دو روزہ سرکاری دورے پر روانہ ہوں گے۔ اس دورے کو دونوں ممالک کے درمیان تیزی سے فروغ پاتے تعلقات کے تناظر میں نہایت اہم قرار دیا جا رہا ہے۔ اس دورے سے اقتصادی، سفارتی اور سکیورٹی تعاون کو نئی جہت ملنے کی توقع ہے۔
دوطرفہ تعلقات مزید مضبوط ہونے کی توقع
اسرائیلی وزیراعظم بنیامین نیتن یاہو نے اپنے ہفتہ وار کابینہ اجلاس میں کہا کہ مودی کا دورہ دوطرفہ تعلقات کو مزید مضبوط بنانے کا موقع فراہم کرے گا۔ انہوں نے خاص طور پر ہائی ٹیک، مصنوعی ذہانت (AI) اور کوانٹم ٹیکنالوجی کے شعبوں میں شراکت داری بڑھانے پر زور دیا۔ ان کے بقول، ’’ہم ہائی ٹیک، اے آئی اور کوانٹم کے میدان میں تعاون کو وسعت دیں گے، جو دونوں ممالک کے تعلقات کو نئی سمت دے گا۔‘‘
پی ایم مودی کی اہم مصروفیات
سرکاری پروگرام کے مطابق وزیراعظم مودی اسرائیلی پارلیمنٹ کنیسٹ سے خطاب کریں گے۔ وہ یروشلم میں واقع عالمی ہولوکاسٹ یادگار یاد واشم کا دورہ بھی کریں گے اور ایک اختراعی تقریب میں شرکت کریں گے۔
نئے اتحاد کی تجویز
بنیامین نیتن یاہو نے اس موقع پر اس بات پر بھی زور دیا کہ اسرائیل خطے میں ایسے نئے اتحاد قائم کرنا چاہتا ہے جو اقتصادی، سفارتی اور سکیورٹی تعاون پر مبنی ہوں۔ ان کے مطابق بھارت، یونان، قبرص اور دیگر ممالک کے ساتھ مل کر ایک مضبوط فریم ورک تشکیل دیا جا سکتا ہے جو مشترکہ چیلنجز کا مقابلہ کرنے کی صلاحیت رکھتا ہو۔
مضبوط اور مستحکم تعلقات
یاد رہے کہ نریندر مودی 2017 میں اسرائیل کا دورہ کرنے والے پہلے بھارتی وزیراعظم تھے، جس کے بعد بنیامین نیتن یاہو نے اگلے برس بھارت کا دورہ کیا تھا۔ گزشتہ برسوں میں دفاع، زراعت، ٹیکنالوجی اور آبی وسائل کے شعبوں میں تعاون میں نمایاں پیش رفت ہوئی ہے۔تجزیہ کاروں کے مطابق یہ دورہ نہ صرف دوطرفہ تعلقات کو مزید مستحکم کرے گا بلکہ خطے میں بدلتی ہوئی سفارتی صف بندی میں بھی اہم کردار ادا کر سکتا ہے۔
