بہار کی بنکی پور اسمبلی سیٹ پر ضمنی انتخاب کے اعلان کے بعد ریاست کی سیاسی سرگرمیاں تیز ہو گئی ہیں۔ مختلف سیاسی جماعتوں نے اپنے امیدواروں کے انتخاب کا عمل شروع کر دیا ہے، جبکہ نظریں خاص طور پر 'جن سوراج' پارٹی پر مرکوز ہیں۔ اطلاعات کے مطابق پارٹی کے بانی پرشانت کشور خود اس نشست سے انتخابی میدان میں اتر سکتے ہیں۔
'جن سوراج' کے ریاستی صدر منوج بھارتی نے میڈیا سے گفتگو کرتے ہوئے کہا کہ پارٹی بنکی پور سے ضرور انتخاب لڑے گی اور پرشانت کشور کو امیدوار بنانے کی تیاری مکمل ہے۔ انہوں نے بتایا کہ پارٹی کے کور گروپ کا اجلاس ہفتے کو ہوگا، جس کے بعد اتوار کو امیدوار کے نام کا باضابطہ اعلان کیا جائے گا۔ ان کے مطابق عوام کی خواہش ہے کہ پرشانت کشور خود الیکشن لڑیں، اس لیے پارٹی کو اس پر کوئی اعتراض نہیں۔
منوج بھارتی نے مہاگٹھ بندھن (گرینڈ الائنس) سے بھی اپیل کی کہ اگر ان کا مقصد بھارتیہ جنتا پارٹی (بی جے پی) کو شکست دینا ہے تو وہ بنکی پور میں جن سوراج کی حمایت کرے۔ انہوں نے دعویٰ کیا کہ یہ نشست گزشتہ تین دہائیوں سے ایک ہی سیاسی خاندان کے قبضے میں ہے۔ ان کا کہنا تھا کہ پٹنہ ضلع کی 114 کچی آبادیوں میں سے 64 صرف بنکی پور اسمبلی حلقے میں واقع ہیں، جو ترقیاتی کاموں کی کمی کی عکاسی کرتی ہیں۔
دوسری جانب بی جے پی نے بھی اپنی پوزیشن واضح کرتے ہوئے اعتماد کا اظہار کیا ہے۔ پارٹی کے ریاستی صدر سنجے سراوگی نے کہا کہ بنکی پور بی جے پی کا مضبوط گڑھ ہے اور یہاں کے عوام پارٹی کے ساتھ کھڑے ہیں۔ انہوں نے کہا کہ سابق رکن اسمبلی نتن نوین اب بی جے پی کے قومی صدر بن چکے ہیں، جس پر حلقے کے عوام کو فخر ہے اور ضمنی انتخاب میں وہ بی جے پی امیدوار کو بھرپور حمایت دیں گے۔
سنجے سراوگی نے یاد دلایا کہ نتن نوین پانچ مرتبہ بنکی پور سے رکن اسمبلی منتخب ہوئے، جبکہ ان کے والد بھی چار مرتبہ اسی حلقے کی نمائندگی کر چکے ہیں۔ ان کے مطابق علاقے میں ہونے والی ترقی ہی بی جے پی کی مسلسل کامیابی کی بنیاد ہے، اس لیے اس بار بھی پارٹی امیدوار کو کامیابی ملنے کا مکمل یقین ہے۔ انہوں نے کہا کہ بی جے پی جلد اپنے امیدوار کے نام کا اعلان کرے گی۔
