کانگریس کے رکن پارلیمنٹ راہول گاندھی ووٹر رائٹس یاترا کے حصہ کے طور پر بہار کا دورہ کر رہے ہیں۔ اس دوران انہوں نے عوام سے خطاب کرتے ہوئے بڑا پیغام دیا ہے۔ راہل گاندھی نے کہا، میں تمام دلت بھائیوں سے کہنا چاہتا ہوں کہ آپ کو یاد رکھنا چاہیے کہ آزادی سے پہلے آپ کی حالت کیا تھی۔ آپ کو اچھوت کہا جاتا تھا، لوگ آپ کو چھو تے تک نہیں تھے، آپ کو مارا پیٹا جاتا تھا۔ آپ کو جو بھی حقوق ملے ہیں، وہ آپ کو آئین کی وجہ سے ملے ہیں۔ آئین نے آپ کو حقوق دیے ہیں۔
راہل گاندھی نے کہا میرے دلت بھائیو، مت بھولنا، یہ آئین ملک کو امبیڈکر جی نے دیا ہے۔ یہ کوئی عام کتاب نہیں ہے۔ یہ ہمارے لیے ایک مقدس کتاب ہے۔ یہ کتاب ہندوستان کی کتاب ہے۔ یہ ہماری سوچ، ہمارے نظریے کی کتاب ہے۔
ووٹر رائٹس یاترا کا مقصد بتایا گیا:
اس دوران کانگریس لیڈر نے بی جے پی پر ووٹ چوری کرنے کا الزام لگاتے ہوئے حملہ کیا۔ انہوں نے کہا کہ ہم جانتے ہیں کہ بی جے پی بہار میں الیکشن چرانے کی کوشش کر رہے ہیں، اسی لیے ہم نے یہاں ووٹر رائٹس یاترا شروع کی ہے، تاکہ ان لوگوں کو معلوم ہو کہ بہار کے لوگ ہوشیار ہیں اور بی جے پی اور الیکشن کمیشن کو بہار میں ایک ووٹ بھی چوری نہیں ہونے دیں گے۔
راہل گاندھی نے کہا کہ یہ بی جے پی والے آپ سے تمام حقوق چھیننا چاہتے ہیں۔ 65 لاکھ ووٹ کاٹے گئے ہیں۔ فہرست نکال کر دیکھیں کہ ای بی سی ہیں، دلت ہیں، اقلیتیں ہیں، پسماندہ طبقے کے لوگ ہیں، غریب ہیں، کسان ہیں، اس میں ایک بھی امیر کا نام نہیں ہے۔ غریبوں کا ووٹ چوری کر رہے ہیں۔ کیونکہ وہ آپ کی آواز کو دبانا چاہتے ہیں۔ وہ آپ کی آواز کو کبھی نہیں دبا سکتے، ہم آپ کے ساتھ ہیں۔
آپ کو بتا دیں کہ بہار میں ووٹر رائٹس یاترا جاری ہے۔ آج (جمعرات) راہل گاندھی سمیت تمام اپوزیشن لیڈروں نے جانکی مندر میں پوجا کی۔ یہ سفر ابھی جاری رہے گا۔
