منصف ٹی وی کے مقبول صحت پروگرام “ہیلتھ اور ہم” میں آج فالج (Stroke) جیسے اہم اور سنجیدہ موضوع پر تفصیلی گفتگو پیش کی گئی، جس میں معروف ماہر ڈاکٹر ورون ریڈی نے شرکت کی۔ پروگرام میں فالج کی وجوہات، علامات، جدید علاج اور اس سے بچاؤ کے طریقوں پر جامع انداز میں روشنی ڈالی گئی۔
قارئین آپ ڈاکٹر کی مکمل گفتگو نیچئے دیئےگئے ویڈیو میں بھی دیکھ سکتےہیں۔
ڈاکٹر ورون ریڈی کے مطابق فالج ایک ایسی طبی حالت ہے جو اس وقت پیدا ہوتی ہے جب دماغ کو خون کی فراہمی متاثر ہو جاتی ہے۔ یہ عام طور پر دو اقسام کا ہوتا ہے: ایک وہ جس میں خون کی نالی بلاک ہو جاتی ہے (Ischemic Stroke) اور دوسرا وہ جس میں خون کی نالی پھٹ جاتی ہے (Hemorrhagic Stroke)۔ دونوں صورتیں دماغی خلیات کو شدید نقصان پہنچا سکتی ہیں۔انہوں نے بتایا کہ فالج کی بڑی وجوہات میں ہائی بلڈ پریشر، ذیابیطس، تمباکو نوشی، موٹاپا اور غیر متوازن طرزِ زندگی شامل ہیں۔ خاص طور پر ہائی بلڈ پریشر کو “خاموش قاتل” قرار دیتے ہوئے انہوں نے اس کے باقاعدہ کنٹرول پر زور دیا۔
علامات کے حوالے سے ڈاکٹر نے کہا کہ فالج کی پہچان فوری ہونا انتہائی ضروری ہے۔ چہرے کا ایک طرف جھک جانا، ہاتھ یا ٹانگ میں کمزوری، بولنے میں دشواری اور اچانک نظر کی کمی جیسی علامات ظاہر ہوتے ہی فوری طور پر قریبی اسپتال پہنچنا چاہیے۔ انہوں نے “FAST” طریقہ بھی بتایا، جس کے ذریعے عوام آسانی سے فالج کی ابتدائی علامات پہچان سکتے ہیں۔
علاج کے بارے میں بات کرتے ہوئے ڈاکٹر ورون ریڈی نے کہا کہ جدید میڈیکل سائنس میں فالج کے علاج کے لیے کئی مؤثر طریقے موجود ہیں، جیسے تھرومبولائسز (clot کو ختم کرنے والی دوا) اور بعض کیسز میں سرجری۔ تاہم، انہوں نے اس بات پر زور دیا کہ علاج کا انحصار اس بات پر ہے کہ مریض کو کتنی جلدی اسپتال پہنچایا جاتا ہے۔
پروگرام میں یہ بھی بتایا گیا کہ صحت مند طرز زندگی اپنانا، باقاعدہ ورزش، متوازن غذا، اور تمباکو نوشی سے پرہیز فالج کے خطرے کو نمایاں طور پر کم کر سکتے ہیں۔آخر میں ڈاکٹر نے ناظرین کو مشورہ دیا کہ وہ اپنی صحت کا خاص خیال رکھیں اور کسی بھی غیر معمولی علامت کو نظر انداز نہ کریں، کیونکہ بروقت تشخیص اور علاج ہی فالج سے بچاؤ کا سب سے مؤثر طریقہ ہے۔
