بھارتی کرکٹ ٹیم کے سابق ٹی ٹوئنٹی کپتان سوریہ کمار یادیو ان دنوں ٹیم سے باہر ہیں، لیکن انہوں نے ایک بار پھر واپسی کی امید ظاہر کی ہے۔ سوریہ کی قیادت میں بھارت نے 2026 ٹی ٹوئنٹی ورلڈ کپ کا خطاب اپنے نام کیا تھا، تاہم فائنل ان کا آخری میچ ثابت ہوا۔ اس کے بعد کپتانی میں تبدیلی کی گئی اور انہیں اسکواڈ سے بھی باہر کردیا گیا۔ سوریہ کمار یادیو کی جگہ شریاس آئر کو ٹی ٹوئنٹی ٹیم کی قیادت سونپی گئی ہے۔ ایسے میں ٹیم میں واپسی سوریہ کے لیے آسان نہیں ہوگی، خاص طور پر اس وقت جب ان کی حالیہ بیٹنگ فارم بھی سوالات کے گھیرے میں رہی ہے۔ ایک تقریب کے دوران میڈیا سے بات کرتے ہوئے سوریہ کمار یادیو نے اپنی واپسی کے امکانات پر کہا کہ وہ اپنی جانب سے پوری محنت کر رہے ہیں اور اگر سب کچھ صحیح رہا تو نتیجہ بھی اچھا آئے گا۔ ان کے اس بیان سے واضح ہے کہ وہ دوبارہ ٹیم انڈیا کی جرسی پہننے کے لیے سخت محنت جاری رکھے ہوئے ہیں۔
ورلڈ کپ میں کپتان اچھے، بلے باز کے طور پر ناکام
2026 ٹی ٹوئنٹی ورلڈ کپ میں سوریہ نے بطور کپتان ٹیم کو کامیابی دلانے میں اہم کردار ادا کیا، لیکن بلے سے ان کی کارکردگی توقعات کے مطابق نہیں رہی۔ انہوں نے ٹورنامنٹ کی 9 اننگز میں 242 رنز بنائے اور ان کا اسٹرائیک ریٹ 136.72 رہا۔ ان اعداد و شمار کے باوجود ان کی کارکردگی پر اس لیے سوال اٹھے کیونکہ وہ اہم مقابلوں میں بڑی اننگز کھیلنے میں ناکام رہے۔ نیوزی لینڈ کے خلاف ٹی ٹوئنٹی ورلڈ کپ کے فائنل میں بھی سوریہ پہلی ہی گیند پر بغیر کوئی رن بنائے آؤٹ ہوگئے تھے۔
آئی پی ایل میں بھی نہیں چلا سوریہ کا بیٹ
سوریہ کمار یادیو کی فارم کا مسئلہ صرف بین الاقوامی کرکٹ تک محدود نہیں رہا۔ 2026 کے آئی پی ایل سیزن میں بھی ان کا بلا توقعات کے مطابق نہیں چلا۔ انہوں نے 13 میچوں کی 13 اننگز میں 20.76 کی اوسط سے 270 رنز بنائے اور پورے سیزن میں صرف دو نصف سنچریاں اسکور کیں۔ اب سوریہ کے سامنے سب سے بڑا چیلنج اپنی فارم واپس حاصل کرنا اور سلیکٹرز کو دوبارہ متاثر کرنا ہے۔ ٹی ٹوئنٹی ٹیم میں جگہ کے لیے مقابلہ مسلسل بڑھ رہا ہے، اس لیے ان کی واپسی کا انحصار آنے والی پرفارمنس پر ہوگا۔ سوریہ کمار یادیو نے واضح کردیا ہے کہ وہ ہمت ہارنے والے نہیں اور ٹیم انڈیا میں واپسی کے لیے اپنی پوری طاقت لگا رہے ہیں۔ اب دیکھنا ہوگا کہ ان کی یہ محنت انہیں دوبارہ بھارتی ٹی ٹوئنٹی اسکواڈ تک پہنچا پاتی ہے یا نہیں۔
