تمل ناڈو کے وزیر اعلیٰ وجے اپنے پہلے غیر ملکی دورے پر برطانیہ گئے ہیں۔ ان کے اس دورے کا اہم مقصد برطانیہ سے تمل ناڈو میں نئی سرمایہ کاری لانا اور ریاست میں پہلے سے موجود صنعتی تعلقات کو مزید مضبوط کرنا ہے۔ اس دورے میں سرمایہ کاری کے ساتھ ساتھ کھیلوں اور آٹوموبائل شعبے پر بھی توجہ دی جا رہی ہے۔ تمل ناڈو حکومت برطانیہ کے موٹر ریسنگ انفراسٹرکچر کا جائزہ لے رہی ہے تاکہ ریاست میں مجوزہ عالمی معیار کی ’موٹر اسپورٹس سٹی‘ کے منصوبے کو آگے بڑھایا جا سکے۔
تمل ناڈو حکومت کے مطابق ’انڈیا-یوکے جامع اقتصادی اور تجارتی معاہدے‘ (CETA) کے 15 جولائی کو نافذ ہونے کے بعد ریاست کے مینوفیکچرنگ اور سروسز شعبوں کے لیے برطانیہ میں نئے مواقع پیدا ہوئے ہیں۔ ٹیکسٹائل اور ملبوسات، چمڑا اور جوتے، آٹوموبائل پرزے، انجینئرنگ کا سامان اور الیکٹرانکس ان شعبوں میں شامل ہیں جو برطانیہ کی مارکیٹ سے فائدہ اٹھا سکتے ہیں۔ حکومت کے مطابق 'CETA' سے صرف برآمدات کو ہی فائدہ نہیں ہوگا بلکہ مشترکہ منصوبوں، تکنیکی تعاون اور نئی سرمایہ کاری کے مواقع بھی پیدا ہوں گے۔
تمل ناڈو میں پہلے سے موجود برطانوی کمپنیوں کو بھی سرمایہ کاری کے اگلے مرحلے کی بنیاد کے طور پر دیکھا جا رہا ہے۔ انجینئرنگ، مالیاتی خدمات اور ٹیکنالوجی کے شعبوں میں کئی برطانوی کمپنیاں ریاست میں کام کر رہی ہیں۔ ان میں بعض کمپنیاں مینوفیکچرنگ یونٹس اور گلوبل کیپبلیٹی سینٹرز بھی چلا رہی ہیں۔
وزیر اعلیٰ وجے کے دورے کا مقصد ان کمپنیوں کے ساتھ تعلقات کو مزید مضبوط کرنا اور جدید مینوفیکچرنگ، آٹوموبائل، الیکٹرک گاڑیوں، الیکٹرانکس اور گلوبل کیپبلٹی سینٹرز کے شعبوں میں مزید سرمایہ کاری حاصل کرنا ہے۔ تمل ناڈو حکومت کے اقتدار میں آنے کے پہلے 100 دنوں کے اندر مختلف کمپنیوں یا اداروں کے ساتھ ایسے معاہدے کیے گئے جن کے تحت تمل ناڈو میں ایک لاکھ کروڑ روپے سے زیادہ کی سرمایہ کاری کی توقع ہے۔ان میں الیکٹرک گاڑیوں کی تیاری پر بھی خاص توجہ دی گئی ہے۔
موٹر اسپورٹس سٹی کے منصوبے پر بھی توجہ
وجے کے برطانیہ دورے میں موٹر اسپورٹس بھی اہم موضوع ہے۔ تمل ناڈو حکومت ریاست میں عالمی معیار کی موٹر اسپورٹس سٹی قائم کرنے کے منصوبے پر کام کر رہی ہے اور اس سلسلے میں برطانیہ کے موٹر ریسنگ انفراسٹرکچر کا جائزہ لیا جا رہا ہے۔ وجے اس ہفتے کے آخر میں سلورسٹون سرکٹ میں ہونے والے ’لے مانز کپ‘ کے راؤنڈ کا باضابطہ آغاز کریں گے۔ لے مانز کپ نے سوشل میڈیا کے ذریعے کہا کہ ایک خصوصی مہمان سلورسٹون میں سبز جھنڈا لہرائے گا اور اس کے لیے تمل ناڈو کے وزیر اعلیٰ وجے کا نام بتایا گیا ہے۔ وجے سلورسٹون سرکٹ کے ٹریک ڈیزائن، حفاظتی نظام اور اس طرح کی سہولت کے تجارتی انتظام کا بھی جائزہ لیں گے۔ تمل ناڈو حکومت کے مطابق اس دورے سے موٹر اسپورٹس کے بنیادی ڈھانچے، کھیلوں کی سیاحت اور آٹوموبائل صنعت سے متعلق دیگر شعبوں کے امکانات کو سمجھنے میں مدد ملے گی۔
حکومت کا مقصد صرف ایک ریسنگ ٹریک بنانا نہیں بلکہ یہ جاننا بھی ہے کہ موٹر اسپورٹس کی ایک بڑی سہولت کو آٹوموبائل مینوفیکچرنگ، ٹیکنالوجی، تفریح اور سیاحت سے جوڑ کر ایک مکمل تجارتی نظام کے طور پر کیسے تیار کیا جا سکتا ہے۔ وجے کے وفد میں کھیلوں کی ترقی کے وزیر آدھو ارجنا، ایس ڈی اے ٹی کے ممبر سکریٹری میگھاناتھ ریڈی اور گائیڈنس تمل ناڈو کے سی ای او دیپک جیکب بھی شامل ہیں۔
