بھارت کی جیلوں میں بند خواتین قیدیوں کی تعداد کو لے کر ایک تشویشناک قومی رجحان سامنے آیا ہے۔ حال ہی میں جاری 'انسٹی ٹیوٹ فار کرائم اینڈ جسٹس پالیسی ریسرچ' (آئی سی پی آر) رپورٹ 'ورلڈ فی میل امپریزمنٹ لسٹ' کے مطابق، گذشتہ دو عشروں میں بھارتی جیلوں میں خواتین کی تعداد، مردوں اور عام آبادی کی شرح نمو کے مقابلے میں دوگنی تیزی سے بڑھی ہے۔
رپورٹ کے مطابق، سال 2000 سے 2022 کے درمیان بھارتی جیلوں میں بند خواتین قیدیوں (تحت سماعت اور سزا یافتہ دونوں) کی تعداد 9,089 سے بڑھ کر 23,772 ہو گئی ہے۔
یہ 162% کی اضافہ ہے، جبکہ اسی عرصے میں بھارت کی کل آبادی میں تقریباً 30% کا اضافہ ہوا اور مرد قیدیوں کی تعداد 310,310 سے بڑھ کر 549,351 ہوئی، جو 77 فیصد اضافہ ہے۔
خواتین قیدیوں کی اس بڑھتی تعداد کے معاملے میں بھارت اب عالمی سطح پر امریکہ، چین، برازیل، روس اور تھائی لینڈ کے بعد چھٹے نمبر پر پہنچ گیا ہے۔
تاہم، بھارت کی جیلوں میں بند کل 5.7 لاکھ قیدیوں میں خواتین کا حصہ صرف 4% ہے، لیکن ان کی بڑھتی شرح نمو نے تشویش پیدا کر دی ہے۔
خواتین قیدی بڑھنے کے اہم اسباب
رپورٹ کے مطابق شہری کاری کے باعث جرائم کی نوعیت میں تبدیلی آئی ہے. اب خواتین منظم جرائم، منشیات کی اسمگلنگ (ڈرگز)، دھوکہ دہی اور انسانی اسمگلنگ جیسے معاملات میں زیادہ دیکھی جا رہی ہیں۔ دیہی علاقوں کے مقابلے میں شہری علاقوں میں خواتین کی عوامی سرگرمی بڑھنے سے یہ رجحان بڑھا ہے۔
رپورٹ کے مطابق، عدالتی رجحانات میں بھی تبدیلی دیکھی گئی ہے۔ اب غیر تشدد جرائم (جیسے جنسی کاروبار یا چھوٹے جرائم) میں بھی عدالتیں خواتین کو ضمانت دینے میں کم سخاوت دکھا رہی ہیں۔
سماجی کلنک کی وجہ سے ان خواتین کو اکثر خاندان کی حمایت نہیں ملتی، جس سے ان کے لیے قانونی جنگ اور ضمانت کا عمل اور مشکل ہو جاتا ہے۔
ساتھ ہی مناسب قانونی امداد کے فقدان میں غربت سے جڑے چھوٹے جرائم (جیسے جیب کٹائی یا چھوٹی چوری) کے لیے خواتین مہینوں جیل میں گزار رہی ہیں۔
بنگلہ دیشی خواتین پر کاروائی سے جیلوں میں خواتین قیدیوں میں اضافہ!
غیر قانونی غیر ملکی شہریوں، خاص طور پر بنگلہ دیشی نژاد خواتین کے خلاف سخت مہم بھی حالیہ برسوں میں خواتین قیدیوں کی تعداد میں اضافے کا باعث بنی ہے۔ ایک اندازے کے مطابق مغربی بنگال کی جیلوں میں 358 بنگلہ دیشی خواتین قید ہیں۔
جیل انتظامیہ کے سامنے بڑی چیلنج
خواتین قیدیوں کی بڑھتی تعداد نے جیل انتظامیہ پر دباؤ بڑھا دیا ہے۔ زیادہ تر جیلوں میں خواتین کے لیے بنیادی ڈھانچہ ناکافی ہے۔
'دی لانسیٹ سائیکیاٹری' کے ایک مطالعے کے مطابق، جیلوں میں تنہائی اور بچوں سے دوری کی وجہ سے خواتین میں ذہنی تناؤ اور خودکشی کی شرح بڑھ گئی ہے۔ جیلوں کے اندر خواتین وارڈوں میں بھیڑ، کاؤنسلر اور طبی خدمات کی کمی ایک سنگین مسئلہ بنی ہوئی ہے۔
