امریکی صدرڈونلڈ ٹرمپ نے کہا ہے کہ روس کے صدر ولادیمیر پوتن اور یوکرین کے صدر ولادیمیر زیلنسکی دونوں روس۔یوکرین جنگ کا خاتمہ چاہتے ہیں۔ وائٹ ہاؤس میں صحافیوں سے گفتگو کرتے ہوئے ٹرمپ نے کہا کہ ان کے مطابق دونوں رہنما اب جنگ کے خاتمے کے خواہاں ہیں اور اس حوالے سے مختلف سطحوں پر بات چیت جاری ہے۔ ٹرمپ نے کہا، ولادیمیر پوتن جنگ ختم کرنا چاہتے ہیں اور صدر زیلنسکی بھی حقیقت میں یہی چاہتے ہیں کہ اب یہ تنازع ختم ہو جائے۔ انہوں نے مزید کہا کہ وہ نیٹو اجلاس میں شرکت کے لیے جا رہے ہیں، جہاں اس معاملے پر بھی تفصیلی بات چیت ہوگی۔
دوسری جانب ٹرمپ نے ایران کے حوالے سے بھی سخت مؤقف اختیار کرتے ہوئے کہا کہ امریکہ یا تو ایران کے ساتھ ایک نیا معاہدہ کرے گا یا پھر "کام مکمل کر دے گا۔" انہوں نے دعویٰ کیا کہ امریکہ ایران کے اہم بنیادی ڈھانچے اور اسٹریٹجک تنصیبات کو نشانہ بنانے کی صلاحیت رکھتا ہے۔ ٹرمپ نے کہا، ہم ہر صورت میں کامیاب ہوں گے، لیکن میری پہلی ترجیح فوجی کارروائی نہیں بلکہ ایک سفارتی معاہدہ ہے، کیونکہ میں 91 ملین لوگوں کو متاثر نہیں کرنا چاہتا۔
انہوں نے مزید دعویٰ کیا کہ اگر ضرورت پڑی تو امریکہ ایران کے پلوں، توانائی کے نظام اور بڑے صنعتی و جدید منصوبوں کو بہت کم وقت میں تباہ کر سکتا ہے۔ ٹرمپ کے مطابق ایران اس وقت شدید مالی دباؤ کا شکار ہے اور امریکہ نے اسے کوئی مالی مدد فراہم نہیں کی۔ امریکی صدر نے یہ بھی کہا کہ ایران کی بجلی کی اہم تنصیبات کو بھی چند گھنٹوں میں غیر فعال بنایا جا سکتا ہے، تاہم انہوں نے ایک بار پھر زور دیا کہ وہ تنازع کے حل کے لیے سفارتی راستے کو ترجیح دیتے ہیں۔
