نوجوان بلے بازویبھو سوریاونشی نے ایک بار پھر اپنی جارحانہ بلے بازی سے کرکٹ شائقین کو حیران کر دیا۔ منگل کو کھیلے گئے میچ میں راجستھان رائلز نے ممبئی انڈینز کو 27 رنز سے شکست دے کر مسلسل تیسری جیت درج کی، لیکن میچ میں سب کی نظر ویبھو کی بے خوف بیٹنگ رہی۔
اننگز کے دوسرے اوور میں جب دنیا کے خطرناک ترین گیند بازوں میں شمار ہونے والے جسپریت بمراہ گیند بازی کے لیے آئے، تو سب کی نظریں اس مقابلے پر مرکوز تھیں۔ عام طور پر بڑے بلے باز بھی بمراہ کے خلاف محتاط رویہ اپناتے ہیں، مگر صرف 15 سالہ ویبھو نے پہلا ہی سامنا کرتے ہوئے وائیڈ لانگ آن کی جانب زبردست چھکا جڑ دیا۔
انہوں نے اسی اوور میں ایک اور چھکا لگا کر واضح کر دیا کہ وہ دفاع کے بجائے جارحانہ حکمت عملی پر یقین رکھتے ہیں۔ اس کے بعد اگلے اوور میں ٹرینٹ بولٹ کی گیند پر بھی ایک شاندار چھکا لگا کر اپنی دھاک بٹھا دی۔ ویبھو نے صرف 14 گیندوں پر 39 رنز کی دھواں دھار اننگز کھیلی، جس میں 5 چھکے اور ایک چوکا شامل تھا۔
دلچسپ بات یہ ہے کہ آئی پی ایل کی تاریخ میں ویراٹ کوہلی کے پاس پاور پلے میں بمراہ کے خلاف سب سے زیادہ تین چھکے لگانے کا ریکارڈ ہے، جو اس بات کو ظاہر کرتا ہے کہ بمراہ اس مرحلے میں کتنے مؤثر ہوتے ہیں۔ تاہم ویبھو نے صرف پانچ گیندوں پر ہی دو چھکے لگا کر اپنی الگ پہچان بنائی ہے۔
میچ میں راجستھان رائلز نے پہلے بیٹنگ کرتے ہوئے 11 اوورز میں 150 رنز کا مضبوط اسکور کھڑا کیا۔ ویبھو سوریاونشی اور یشسوی جیسوال نے پہلی وکٹ کے لیے صرف 30 گیندوں پر 80 رنز کی شراکت قائم کی۔ جیسوال نے 32 گیندوں پر 77 رنز کی شاندار اننگز کھیلی اور انہیں پلیئر آف دی میچ قرار دیا گیا۔
ہدف کے تعاقب میں ممبئی انڈینز کی بیٹنگ مکمل طور پر ناکام رہی۔ ٹیم صرف 123 رنز بنا سکی، جبکہ روہت شرما، سوریہ کمار یادیو، ہاردک پانڈیا اور تلک ورما جیسے بڑے کھلاڑی جلدی آؤٹ ہو گئے۔
یہ جیت راجستھان رائلز کے لیے نہ صرف اہم ہے بلکہ ویبھو سوریاونشی جیسے نوجوان ٹیلنٹ کے ابھار کی بھی واضح نشاندہی کرتی ہے، جو مستقبل میں کرکٹ کی دنیا میں بڑا نام بن سکتا ہے۔
