فلمی دنیا سے سیاست کے میدان میں قدم رکھنے والے وجئے نے تمل ناڈو کی سیاست میں زبردست انٹری کرتے ہوئے اپنی جماعت ٹی وی کے کو اسمبلی انتخابات میں سب سے بڑی پارٹی بنا دیا ہے۔ پارٹی نے مجموعی طور پر 108 نشستیں حاصل کی ہیں، تاہم حکومت بنانے کے لیے اسے مزید 10 نشستوں کی ضرورت ہے۔
اسی دوران کانگریس کی جانب سے ٹی وی کے کی حمایت کا اعلان ایک اہم پیش رفت کے طور پر سامنے آیا ہے۔ ذرائع کے مطابق وجئے نے پہلے ہی کانگریس سے تعاون کی درخواست کی تھی، جس پر مثبت ردعمل دیتے ہوئے آل انڈیا کانگریس کمیٹی نے یہ فیصلہ ریاستی یونٹ پر چھوڑ دیا تھا۔
گزشتہ روز کانگریس کی ایک ورچوئل میٹنگ میں ٹی وی کے کی حمایت کی قرارداد منظور کر لی گئی۔ اطلاعات ہیں کہ کانگریس جلد ہی اپنی حمایت کا باقاعدہ خط جاری کرے گی، جس کے بعد پارٹی کے منتخب اراکین اسمبلی وجئے سے ملاقات کر سکتے ہیں۔
ذرائع کا کہنا ہے کہ وجئے کو کانگریس کی حمایت کے بارے میں پہلے ہی آگاہ کر دیا گیا ہے، جس کے بعد دونوں جماعتوں کے درمیان اتحاد تقریباً یقینی نظر آ رہا ہے۔ آئندہ اجلاس میں اتحاد کے خدوخال کو حتمی شکل دینے اور حکومت سازی کی حکمت عملی طے کی جائے گی۔
سیاسی ماہرین کے مطابق اگر یہ اتحاد مضبوط شکل اختیار کر لیتا ہے تو تمل ناڈو میں ایک نئی سیاسی سمت دیکھنے کو مل سکتی ہے، جہاں ایک فلمی سپر اسٹار بطور وزیر اعلیٰ ابھرنے کے قریب ہے۔
