مرکزی حکومت پارلیمنٹ کے اس اجلاس میں وقف ترمیمی بل پاس کرانے کی تیاری کر رہی ہے۔ ذرائع کے مطابق یہ بل 2 اپریل کو پارلیمنٹ میں پیش کیا جا سکتا ہے۔ پہلے اسے لوک سبھا میں پیش کیا جائے گا۔آپ کو بتاتے چلیں کہ پارلیمنٹ کا موجودہ اجلاس 4 اپریل تک جاری ہے، ایسے میں حکومت 2 دن کے اندر بل کو دونوں ایوانوں سے پاس کروانا چاہے گی۔تاہم اس بل کو لیکر اب سب کی نظریں نتیش کمار ،چندرا بابو نائڈواور چراغ پاسوان پر ہے۔
لوک سبھا میں بی جے پی کے 240ممبران پارلیمنٹ :
اس وقت لوک سبھا میں 542 ممبران ہیں ۔ بل کی منظوری کے لیے 272 ارکان پارلیمنٹ کی حمایت ضروری ہے۔اس وقت بی جے پی کے پاس 240 ایم پی ہیں۔ اسی وقت، نیشنل ڈیموکریٹک الائنس (این ڈی اے) کے پاس جنتا دل یونائیٹڈ کے 12، تیلگو دیشم پارٹی (ٹی ڈی پی) کے 16، لوک جن شکتی پارٹی (ایل جے پی) کے 5، راشٹریہ لوک دل (آر ایل ڈی) کے 2 اور شیو سینا کے 7 ایم پی ہیں۔اس طرح این ڈی اے کے ارکان کی کل تعداد 293 تک پہنچ جاتی ہے جو کہ اکثریت کے لیے مطلوبہ تعداد سے زیادہ ہے۔تاہم اس بل کی منظوری اسی وقت ممکن ہے جب نتیش ،نائڈو اور چراغ پاسوان اس بل کی حمایت کرئینگے۔
کیا راجیہ سبھا کی تعداد حکومت کے حق میں ہے؟
راجیہ سبھا میں ارکان کی کل تعداد 236 ہے اور اکثریتی تعداد 119 ہے۔اس وقت بی جے پی کے 98 ارکان ہیں۔ بی جے پی کے علاوہ این ڈی اے میں جے ڈی یو کے 4، ٹی ڈی پی کے 2، نیشنلسٹ کانگریس پارٹی (این سی پی) کے 3 اور آر ایل ڈی سے 1 ایم پی شامل ہیں۔ اگر 6 نامزد ارکان کو شامل کیا جائے تو یہ تعداد اکثریت سے تجاوز کر جائے گی۔اس لحاظ سے اگرلوک سبھا سے بل کو منظوری ملتی ہے تو راجیہ سبھا میں بھی حکومت کو زیادہ پریشانی کا سامنا نہیں کرنا پڑے گا۔
دونوں ایوانوں میں اپوزیشن کی پوزیشن کیا ہے؟
لوک سبھا میں کانگریس کے 99 ممبران ہیں اور اپوزیشن اتحاد انڈیا کے پاس 233 ممبران ہیں۔اس کے علاوہ آزاد سماج پارٹی اور شرومنی اکالی دل (SAD) کسی بھی اتحاد کا حصہ نہیں ہیں۔ کچھ آزاد ارکان اسمبلی بھی کسی کے ساتھ نہیں ہیں۔ساتھ ہی کانگریس کے پاس 27 ممبران ہیں اور انڈیا اتحاد کے پاس راجیہ سبھا میں کل 85 ممبر ہیں۔ اس کے علاوہ 9 ارکان وائی ایس آر کانگریس، 7 بیجو جنتا دل (بی جے ڈی)، 4 آل انڈیا دراوڑ منیترا کزگم (اے آئی ڈی ایم کے) اور 3 آزاد اور چھوٹی پارٹیوں سے ہیں۔
وقف بل کے حوالے سے اب تک کیا ہوا ہے؟
مرکزی حکومت نے گزشتہ سال 28 جولائی کو وقف (ترمیمی) بل 2024 پارلیمنٹ میں پیش کیا تھا۔ اپوزیشن جماعتوں کے سخت اعتراضات کے بعد اسے 8 اگست کو مشترکہ پارلیمانی کمیٹی (جے پی سی) کے پاس بھیج دیا گیا۔کمیٹی نے اس سال 30 جنوری کو لوک سبھا اسپیکر اوم برلا کو رپورٹ پیش کی۔اس کے بعد جے پی سی کی رپورٹ کی بنیاد پر مرکزی کابینہ نے بل میں تجویز کردہ 23 میں سے 14 تبدیلیوں کو منظوری دی۔جسے اب آئندہ کل 2 اپریل کو پارلیمنٹ میں پیش کیا جا سکتا ہے۔
