افغانستان کے کپتان رحمت شاہ نے آئی سی سی منز ٹیسٹ پلیئر رینکنگ میں غیر معمولی چھلانگ لگا کر تاریخ رقم کر دی ہے۔ زمبابوے کے خلاف جاری ٹیسٹ سیریز میں شاندار کارکردگی کے بعد وہ ٹاپ 10 میں شامل ہو گئے ہیں اور اس وقت 7ویں پوزیشن پر ہیں۔ یہ پہلی مرتبہ ہے کہ ٹیسٹ کرکٹ کے کسی بھی زمرے میں کوئی افغان کھلاڑی ٹاپ 10 تک پہنچا ہو۔
آئی سی سی کے مطابق 2 میچوں کی سیریز کے پہلے ٹیسٹ میں ان کی 173 رنز کی کلاسیک اننگ کے نتیجے میں رینکنگ میں 6 درجے بہتری آئی اور انہیں کیریئر کی بہترین ریٹنگ حاصل ہوئی۔ اس پیش رفت کے ساتھ وہ ہندوستانی کپتان شبمن گل، جنوبی افریقہ کے ایڈن مارکرم اور سری لنکا کے کامندو مینڈس جیسے نمایاں بیٹروں سے رحمت شاہ آگے نکل گئے۔ افغانستان کے لیے کھیلنے والے 33 سالہ رحمت شاہ کی یہ اننگ ٹیسٹ کرکٹ میں ان کی 5ویں سنچری اور رواں برس کی دوسری سنچری تھی، جس نے نہ صرف میچ کا نقشہ بدلا بلکہ ملک کی کرکٹ تاریخ میں ایک نئی مثال بھی قائم کی۔ شارجہ میں کھیلی جا رہی اس سیریز نے رینکنگ کی درجہ بندی پر واضح اثر ڈالا ہے۔
زمبابوے کے تجربہ کار بیٹر کریگ اِرون کو بھی تازہ رینکنگ میں فائدہ ہوا ہے۔ افغانستان کے خلاف اسی شارجہ ٹیسٹ کی دوسری اننگ میں ڈبل سنچری جڑنے کے بعد وہ 9 درجے ترقی پا کر 48ویں نمبر پر آ گئے ہیں۔
دوسری جانب بنگلہ دیش اور ویسٹ انڈیز کے درمیان آئی سی سی ورلڈ ٹیسٹ چیمپئن شپ سیریز مکمل ہونے پر بیٹنگ رینکنگ میں مزید اتار چڑھاؤ دیکھا گیا۔ ویسٹ انڈیز کے کاویم ہوج 12 درجے اوپر آ کر 52ویں پوزیشن پر پہنچے، بنگلہ دیش کے توحید ہردوئے نے بھی پیش رفت کی اور 60ویں نمبر پر آ گئے، جبکہ ویسٹ انڈیز کے ابھرتے ہوئے بیٹر عامر جنگو نے 28 درجے چھلانگ لگا کر 62ویں مقام حاصل کیا۔
بولنگ کے محاذ پر ویسٹ انڈیز کے بائیں ہاتھ کے اسپنر جومیل واریکن نے بنگلہ دیش کے خلاف پلیئر آف دی سیریز رہنے کے بعد کیریئر کی بہترین ریٹنگ سمیٹی، وہ ٹیسٹ بولنگ رینکنگ میں 11 درجے ترقی کے ساتھ 19ویں نمبر پر پہنچے اور آل راؤنڈر فہرست میں 4 درجے بہتری کے بعد 31ویں پوزیشن سنبھالی۔ ان کے ساتھی جسٹن گریوز ایک درجہ اوپر آ کر ٹیسٹ آل راؤنڈرز میں 8ویں نمبر پر فائز ہو گئے۔
ایک روزہ کرکٹ میں بھی رینکنگ میں تازہ تبدیلیاں سامنے آئی ہیں۔ بھارت اور نیوزی لینڈ کے درمیان جاری سیریز کے ابتدائی 2 میچوں کے بعد بھارتی اسپنر اکشر پٹیل ویلنگٹن میں دوسرے ون ڈے میں 28 رنز کے عوض 2 وکٹیں لے کر بولرز کی فہرست میں 23 درجے ابھر کر 21ویں نمبر پر آ گئے۔ آکلینڈ میں پہلے میچ میں 4 وکٹیں حاصل کرنے والے بائیں ہاتھ کے فاسٹ بولر ارشدیپ سنگھ 11 درجے چڑھ کر 31ویں مقام پر پہنچے، جبکہ نوجوان تیز گیند باز گرنور برار، جو اس سیریز سے قبل ٹاپ 100 سے باہر تھے، 2 میچوں میں 7 وکٹیں لے کر 48ویں پوزیشن تک آگئے۔
افغانستان کی ٹیم کی مجموعی پیش رفت قابل ذکر ہے، جو رواں ماہ کے آغاز میں آئی سی سی مردانہ ون ڈے ٹیم رینکنگ میں اپنی تاریخ کی بہترین چھٹی پوزیشن تک پہنچی۔ کرکٹ مبصرین اسے افغان کرکٹ کے مسلسل ارتقا، ڈومیسٹک ڈھانچے کی مضبوطی اور بین الاقوامی سطح پر بڑھتی ہوئی مسابقت کا ثمر قرار دیتے ہیں۔
