ملک کی کئی ریاستوں میں مسلسل موسلادھار بارش نے تشویش بڑھا دی ہے۔ اڈیشہ، چھتیس گڑھ اور اتر پردیش میں بارش کے باعث معمولات زندگی متاثر ہوئے ہیں، جبکہ کئی علاقوں میں سیلاب کا خطرہ بھی پیدا ہو گیا ہے۔ انتظامیہ نے حساس اضلاع میں احتیاطی اقدامات تیز کر دیے ہیں اور لوگوں کو موسم کی صورتحال پر نظر رکھنے کی ہدایت دی گئی ہے۔ اڈیشہ میں گہرے دباؤ کے باعث ہونے والی شدید بارش نے کئی علاقوں میں مشکلات پیدا کر دی ہیں۔ مسلسل بارش کے نتیجے میں ریاست کی متعدد ندیاں خطرے کے نشان سے اوپر بہہ رہی ہیں، جس سے سیلاب کا خطرہ بڑھ گیا ہے۔ ریاستی حکومت کے مطابق بارش سے متعلق واقعات کے باعث ریاست بھر میں 857 گاؤں متاثر ہوئے ہیں، جبکہ تقریباً 14,479 افراد کو محفوظ مقامات پر منتقل کیا گیا ہے۔ انتظامیہ کی جانب سے متاثرہ علاقوں میں امدادی کارروائیاں جاری ہیں اور ضرورت کے مطابق لوگوں کو محفوظ مقامات تک پہنچایا جا رہا ہے۔
بارش کی شدت کا اندازہ اس بات سے لگایا جا سکتا ہے کہ ریاست میں کم از کم 63 مقامات پر 100 ملی میٹر سے زیادہ بارش ریکارڈ کی گئی، جبکہ تین مقامات پر بارش کا اعداد و شمار 300 ملی میٹر سے بھی زیادہ رہا۔ بالاسور ضلع میں جلکا اور بدھا بلنگا ندیاں خطرے کے نشان سے اوپر بہہ رہی ہیں، جبکہ جاج پور ضلع میں بیترانی اور کنی ندیاں بھی خطرے کی سطح عبور کر چکی ہیں۔ دریاؤں میں پانی کی سطح بڑھنے سے نشیبی علاقوں میں رہنے والے لوگوں کی مشکلات میں اضافہ ہوا ہے۔
چھتیس گڑھ میں بھی موسم ایک بار پھر خراب ہونے کی پیش گوئی کی گئی ہے۔ ریاست میں جاری موسلادھار بارش کے پیش نظر کئی اضلاع کے لیے ریڈ اور اورنج الرٹ جاری کیا گیا ہے۔ رائے پور کے موسمیاتی مرکز کے مطابق وسطی چھتیس گڑھ کے کچھ حصوں کے لیے ریڈ الرٹ، جبکہ جنوبی اضلاع کے لیے اورنج الرٹ جاری کیا گیا ہے۔ موسمی نظام کے آئندہ دو روز تک فعال رہنے کا امکان ہے، تاہم 27 ستمبر سے بارش کی سرگرمیوں میں کمی آنے کی توقع ظاہر کی گئی ہے۔ رپورٹ کے مطابق جمعرات سے ریاست کے کم از کم 24 مقامات پر 100 ملی میٹر سے زیادہ بارش ریکارڈ کی گئی ہے۔ مسلسل بارش اور ممکنہ سیلاب کے پیش نظر ریاست بھر کے اسکول 26 ستمبر کو بند رکھنے کا فیصلہ بھی کیا گیا ہے۔
اتر پردیش میں بھی شدید بارش، گرج چمک اور اچانک سیلاب کے خدشے کے پیش نظر حساس اضلاع میں خصوصی چوکسی برقرار رکھنے کی ہدایات دی گئی ہیں۔ انتظامیہ کو کسی بھی ہنگامی صورتحال سے نمٹنے کے لیے تیار رہنے کو کہا گیا ہے۔ موسم کی خراب صورتحال کے درمیان متاثرہ ریاستوں میں انتظامیہ کی توجہ نشیبی علاقوں، دریاؤں کے کناروں اور بارش سے متاثرہ دیہات پر مرکوز ہے۔ لوگوں کو غیر ضروری سفر سے گریز کرنے اور مقامی حکام کی ہدایات پر عمل کرنے کا مشورہ دیا گیا ہے۔
