حکومتِ ہند کی وزارتِ ثقافت کے تحت اندرا گاندھی نیشنل سینٹر فار دی آرٹس (IGNCA) کی جانب سے آج، 14 اکتوبر سے 16 اکتوبر تک نئی دہلی کے وگیان بھون میں ایک بین الاقوامی کانفرنس کا انعقاد کیا جا رہا ہے۔ ’برہتر بھارت: دنیا بھر میں ہندوستان کے ثقافتی روابط‘ کے موضوع پر ہونے والی اس کانفرنس میں 50 ممالک کے مندوبین، سفیروں اور ماہرینِ تعلیم کی شرکت متوقع ہے۔
وزارتِ ثقافت کی ’گلوبل انگیجمنٹ اسکیم‘ کے تحت منعقد ہونے والی اس کانفرنس کا مقصد دنیا کے مختلف ممالک کے ساتھ ہندوستان کے تاریخی اور موجودہ دور کے ثقافتی روابط پر غور و خوض کرنا ہے۔ اس دوران ہندوستان کی ثقافتی وراثت، بین الاقوامی تعلقات اور مختلف معاشروں کے درمیان ثقافتی تبادلے سے متعلق موضوعات پر گفتگو کی جائے گی۔ کانفرنس میں شریک مندوبین ہندوستان اور دنیا کے دیگر ممالک کے درمیان ثقافتی تعلقات کو مزید مستحکم بنانے کے امکانات پر بھی تبادلۂ خیال کریں گے۔
اس بین الاقوامی کانفرنس سے وزیر اعظم نریندر مودی ایک خصوصی ویڈیو پیغام کے ذریعے خطاب کریں گے، جبکہ مرکزی وزیرِ ثقافت گجیندر سنگھ شیخاوت کانفرنس کا افتتاح کریں گے۔تین روزہ کانفرنس میں مجموعی طور پر 10 موضوعات کا احاطہ کیا جائے گا۔ اس میں مختلف ممالک کے نمائندے اور ماہرین اپنے خیالات پیش کریں گے اور ہندوستان کے عالمی ثقافتی روابط کو آگے بڑھانے کے امکانات پر گفتگو کریں گے۔اس کانفرنس کو ہندوستان کی ثقافتی شناخت اور بین الاقوامی سطح پر اس کے ثقافتی تعلقات کو اجاگر کرنے کے ایک اہم موقع کے طور پر دیکھا جا رہا ہے۔
